ES choča realizavać ambicyjny płan pa naroščvańni vytvorčaści kampjutarnych čypaŭ
Praź niedachop čypaŭ ES stanovicca ŭraźlivym da handlovaj baraćby pamiž ZŠA i Kitajem. Jeŭrapiejskija krainy imknucca heta źmianić.
U sakaviku pradstaŭniki ES zajavili, što błok płanuje pavialičyć udvaja vytvorčaść čypaŭ da 2030 hoda i tym samym zaniać 20% suśvietnaha rynku. Maŭlaŭ, deficyt čypaŭ u ES pryvioŭ da taho, što ŭ pieršym kvartale 2021 hoda było vyrablena na miljon aŭtamabilaŭ mienš u paraŭnańni z takim ža pieryjadam letaś. U svaju čarhu, aŭtavytvorčaść źjaŭlajecca adnoj z klučavych halin u jeŭrapiejskaj ekanomicy, piša Deutsche Welle.
Ambicyjny płan ES «Ličbavy kompas» praduhledžvaje inviestycyi ŭ pamiery 140 miljardaŭ jeŭra ŭ ličbavy siektar, a taksama kab jeŭrapiejskija firmy pa vytvorčaści čypaŭ stali pieradavymi paśla dvuch apošnich dziesiacihodździaŭ aŭtsorsinhu ŭ azijackija krainy. Taksama isnuje mierkavańnie, što ES płanuje supracoŭničać z kampanijami TSMC i Samsung.
Dva dziesiacihodździ tamu Jeŭropa była lidaram u technałohijach, dziakujučy industryi bytavoj elektroniki i mabilnym telefonam pieršaha pakaleńnia ad Nokia, Ericsson i Siemens. Ale pastupova ich papularnaść źmienšyłasia, i vytvorcy pačali inviestavać u Aziju i pradavać bolš čypaŭ u hetym rehijonie.
U 2012 hodzie jeŭrapiejskaja industryja čypaŭ vyrabiła 70% svaich kampanientaŭ u ES, a letaś heta ličba źniziłasia da 54%. Siarod 10 viadučych vytvorcaŭ čypaŭ tolki adna kampanija NXP źjaŭlajecca jeŭrapiejskaj. Adnak i jana pad pahrozaj źniknieńnia, bo hałandskuju kampaniju płanuje vykupić amierykanski kankurent Qualcomm.
Pabudova bujnoha sučasnaha zavoda pa vytvorčaści čypaŭ budzie kaštavać ES vializnych hrošaj. Da taho ž, nieviadoma, ci akupiacca hetyja vydatki, bo 20% usich čypaŭ vyrablaje Tajvań, 15% — Paŭdniovaja Kareja, 7% — Sinhapur. I viadučyja kampanii źbirajucca tolki naroščvać svaju vytvorčaść.
Bolš za toje, u ES niama mocnaha rynku i bujnych spažyŭcoŭ kampjutarnych čypaŭ. Tamu, na dumku ekśpiertaŭ, raźmiaščeńnie bujnoha zavoda u Jeŭropie moža stać stratehičnaj pamyłkaj.
Kamientary