«Małady front» patrabuje vyzvaleńnia Arcioma Dubskaha

Paplečniki aktyvista «Maładoha frontu» Arcioma Dubskaha raspačali kampaniju za vyzvaleńnie svajho siabra. Asipovicki sud pakaraŭ chłopca hodam pazbaŭleńnia voli za parušeńnie praviłaŭ adbyćcia pakarańnia ŭ «spravie 14‑ci».

Lider «Maładoha frontu» Źmicier Daškievič paviedamiŭ, što paplečniki Arcioma Dubskaha buduć vykarystoŭvać usie srodki, kab jaho jak najchutčej vyzvalili.

«Kampanija budzie ŭklučać u siabie raspaŭsiudžvańnie infarmacyjnych materyjałaŭ pra Arcioma i «spravu 14‑ci», pra jakuju, na žal, niekatoryja zabylisia. Budziem rasklejvać partrety Arcioma Dubskaha i ładzić vuličnyja akcyi roznaha farmatu. My budziem patrabavać biezumoŭnaha i najchutčejšaha vyzvaleńnia našaha paplečnika. U nas jość nadzieja, što jon budzie vyzvaleny. Tym bolš što ŭsie fihuranty «spravy 14‑ci» pryznanyja viaźniami sumleńnia«.

Arcioma Dubskaha pakarali dvuma hadami abmiežavańnia voli ŭ «spravie 14‑ci». Padčas adbyćcia pakarańnia suprać jaho raspačali jašče adnu kryminalnuju spravu — za karystańnie čužoj sim‑kartkaj dla vychadu ŭ internet.

Kali milicyjanty skłali dva raparty za toje, što nie zaśpieli Arcioma doma ŭ časie pravierki, chłopcu stali pahražać treciaj kryminalnaj spravaj.

Na sudzie Arciom kazaŭ, što mienavita heta padšturchnuła jaho źjechać va Ŭkrainu.

Arciomava maci Alena Dubskaja nie čakała, što jaje syna voźmuć pad vartu ŭ sudovaj zali. Učora jana pieradała jamu charčy. Spatkańnie adbudziecca dniami ŭ babrujskim śledčym izalatary, kudy Arcioma pieraviazuć 10 lipienia.

«Nu, vina jaho, kaniečnie, jość. Ja ž nie kažu, što jon nie vinavaty… Jon źjechaŭ va Ŭkrainu. Ale adzin hod źniavoleńnia… Navošta tady jaho adpuskali? Vypuścili jaho tady raptoŭna z Babrujsku. Jon mnie telefanuje: «Mama, pryjazdžaj za mnoj». U jaho byli inšyja płany. Chacieŭ pajechać va Ŭkrainu, tam znajści pracu. Tut jamu žyć i pracavać nie daduć».

Anatol Labiedźka ličyć, što akcyi salidarnaści z palitviaźniami słužać maralnaj padtrymkaj, ale nie ŭpłyvajuć na biełaruskija ŭłady.

«Kali ludzi znachodziacca za kratami i nie adčuvajuć pulsu žyćcia, i adčuvajuć, što zastalisia sam‑nasam z turemnym načalstvam, to psichałahična im vielmi ciažka.

Pavodle sudovaha rašeńnia, paŭhoda pazbaŭleńnia voli skasujuć toj termin pakarańnia, jaki musić adbyć Arciom pavodle «spravy 14‑ci». Hod pazbaŭleńnia voli Arciom Dubski budzie adbyvać u papraŭčaj kałonii ahulnaha režymu.

Raniej sud Maskoŭskaha rajonu Miensku pakaraŭ niepaŭnaletniaha Maksima Dašuka ŭ anałahičnaj spravie, dadaŭšy jamu jašče dva dni da papiaredniaha terminu.

• 0
• 0
• 0
• 0
• 0
• 0
• 0
• 0