Ułady Čarnahoryi apublikavali śpis ludziej, jakija atrymali «załaty pašpart». U jaho trapiŭ i biełaruski biznesmien z Top-40
U niekatorych krainach śvietu jość instytut «załatoha pašparta» — treba inviestavać peŭnuju sumu hrošaj u ekanomiku, kab atrymać pašpart biez dadatkovych umoŭ. Mahčymaściu karystajucca zamožnyja ludzi. I voś, ułady Čarnahoryi apublikavali śpis asob, jakija atrymali załatyja pašparty za apošni čas.
Kab atrymać hramadzianstva hetaj drobnaj krainy pa-za miežami ES, zajaŭniku treba inviestavać u nieruchomaść ad 250 tysiač jeŭra na poŭnačy krainy, abo ad 450 tysiač jeŭra na poŭdni.
U apublikavanym śpisie bolšaść — rasijanie. Ale jość dvoje biełarusaŭ. Heta IT-pradprymalnik Dźmitryj Chusainaŭ sa svajoj žonkaj Marynaj Jarmałovič.
Miarkujučy pa dakumiencie, novaje hramadzianstva Chusainaŭ atrymaŭ u pačatku 2021 hoda.
Chusainaŭ znachodzicca na 40 miescy ŭ novym rejtynhu najbolš paśpiachovych i ŭpłyvovych pradprymalnikaŭ Biełarusi ad ej.by. Jon viadomy pa svajoj kampanii mabilnych hulniaŭ Belka Games, jakaja apošnimi hadami pakazvaje šalony pryrost.
U Belka Games — aljans z amierykanskim vydaŭcom hulniaŭ AppLovin, hulni biełarusaŭ ściahvajucca tysiačami ludziej štodzień, u kampanii šmatmiljonnyja abarony, prybytki vymiarajucca dziasiatkami miljonaŭ dalaraŭ. Raniej Belka Games adkryła ofis u Litvie.
Chusainaŭ byŭ łaŭreatam fondu prezidenta Biełarusi pa padtrymcy talenavitaj moładzi. Jamu 35 hod.
Biełaruskaje zakanadaŭstva nie pryznaje najaŭnaści ŭ hramadzianina pašparta inšaj dziaržavy.
Ciapier čytajuć
«Ja nie sustrakaŭ nivodnaha vajskoŭca, chto b nie pavažaŭ Drapataha»: na čale USU staŭ kamandzir novaha pakaleńnia. Što ŭjaŭlaje saboj Michaił Drapaty?4
Kamientary