«Nieabyjakavy hramadzianin» napisaŭ u milicyju na viadomaha historyka 17 zajaŭ za reposty
27 kastryčnika ŭ dačynieńni da daśledčyka masavych represij Ihara Kuźniacova pačaŭsia sud za reposty ŭ sacyjalnych sietkach pavodle artykuła 19.11 KaAP. Pa słovach viadomaha historyka, adzin nieabyjakavy hramadzianin pa proźviščy Procharaŭ za paŭtara miesiaca napisaŭ na navukoŭca 17 zajaŭ u milicyju, piša «Radyjo Svaboda».
«Zajavy na mianie roznyja: pačynajučy ad reabilitacyi nacyzmu da proćmy repostaŭ.
Pieršaja zajava — kali ja repościŭ viadomaje fota, dzie hrupa voinaŭ trymaje pavieržany nacyscki ściah. Procharaŭ napisaŭ, što Kuźniacoŭ prapavieduje nacyzm. I druhoje — nibyta ja repościŭ niejki materyjał «Biełsata».
Učastkovy apytaŭ mianie pa pieršym epizodzie. Jasnaja sprava, tam ničoha nie było. Ale hramadzianin Procharaŭ napisaŭ skarhu vyšej, što, maŭlaŭ, učastkovy nie tolki prajaŭlaje łajalnaść, a ŭstupiŭ u złačynnuju zmovu z Kuźniacovym, kab toj paźbieh adkaznaści pavodle artykuła 19.11», — raskazaŭ navukoviec.
Pakolki termin razhladu spraŭ pa pieršych zajavach Procharava skončyŭsia, toj 3 kastryčnika napisaŭ na daśledčyka jašče 6 zajaŭ, što Kuźniacoŭ rabiŭ reposty z sajtaŭ «Biełsata» i Tut.by.
«Ale ŭsie materyjały, jakija ja repościŭ, byli vyklučna pa historyi, adukacyi, pra Jeŭrasajuz, byŭ vystup prezidenta Polščy. To-bok pa źmieście tam ničoha ekstremisckaha niama. Ale pakolki jany byli raźmieščanyja na takich sajtach, u milicyi skłali pratakoł i nakiravali ŭ sud Savieckaha rajona», — tłumačyć Ihar Kuźniacoŭ.
27 kastryčnika adbyłosia sudovaje pasiadžeńnie, jakoje doŭžyłasia roŭna adnu chvilinu. Sudździa adrazu paviedamiła, što materyjały nakiravanyja na dapracoŭku ŭ Savieckaje RUUS.
Ihar Kuźniacoŭ śćviardžaje, što Procharaŭ — čałaviek realny i piša skarhi rehularna.
Kali navukoviec napisaŭ na svajoj staroncy ŭ fejsbuku, što «Procharaŭ źjaŭlajecca infarmataram», i papiaredziŭ, kab ludzi «byli pilnymi i aściarožnymi», hramadzianin padaŭ čarhovuju skarhu ŭ RUUS, kab Kuźniacova pryciahnuli ŭžo da kryminalnaj adkaznaści.
«Procharaŭ napisaŭ, što ja jaho pakryŭdziŭ i nazvaŭ infarmataram, a taksama vykłaŭ piersanalnyja danyja hetaha Procharava. Choć akramia proźvišča i inicyjałaŭ tam ničoha nie było.
Pakul nieviadoma, kali adbuducca nastupnyja sudovyja pasiadžeńni pa skarhach Procharava.
Jakraz u kancy kastryčnika skončyŭsia kantrakt Ihara Kuźniacova ŭ BDU, dzie jon vykładaŭ na fakultecie mižnarodnych adnosin. Univiersitet praciahvać kantrakt z historykam nie staŭ.
Ihar Kuźniacoŭ vykładaŭ u BDU 23 hady, pracavaŭ na kafiedry dypłamatyčnaj i konsulskaj słužby fakulteta, uvachodziŭ u pieršuju dziasiatku siarod vykładčykaŭ BDU pa cytavanaści ŭ servisie Google Scholar Citations (heta adzin z kryteryjaŭ acenki ŭzroŭniu rejtynhu vykładčykaŭ).
Jon abaraniŭ kandydackuju dysiertacyju pa stalinskich represijach, praciahvaŭ zajmacca hetaj tematykaj i aktyŭna vystupaŭ u ŚMI. Za jaho pazicyju ŭ dziaržaŭnych ŚMI Kuźniacova nazyvali «łžehistorykam».
«Na mienia samoho napisali čietyrie donosa». Istorik Ihoŕ Kuźniecov o ślitoj bazie obraŝienij v miliciju i parallelach s 1930-mi hodami
Ciapier čytajuć
«Ja nie sustrakaŭ nivodnaha vajskoŭca, chto b nie pavažaŭ Drapataha»: na čale USU staŭ kamandzir novaha pakaleńnia. Što ŭjaŭlaje saboj Michaił Drapaty?2
Kamientary