Zatrymali za čyrvonyja krasoŭki. Jak milicejski načalnik dastavaŭ ź CIP syna «jabaćki»
Represiŭnaja mašyna ŭ Biełarusi pracuje biez razboru, i sami jaje vykanaŭcy heta bačać. Takuju vysnovu možna zrabić z novaha źlivu, jaki apublikavali byłyja siłaviki. Chirurhu vyšejšaj katehoryi Minskaj abłasnoj balnicy pryjšłosia padniać usie svaje suviazi, kab vyzvalić sa śledčaha izalatara na Akreścina nievinavataha syna, jakoha zabrali za čyrvonyja krasoŭki.
Byłyja siłaviki zapeŭnivajuć, što hałasy na zapisie naležać načalniku HUKV MUS pałkoŭniku milicyi Śvirydu Maksimu Alaksandraviču, načalniku UKV KM HUUS Minharvykankama pałkoŭniku milicyi Ušakovu Siarhieju Uładzimiraviču i Kupčeniu Alaksandru Ściapanaviču, byłomu načalniku UAPP MHB HUUS, ciapier načalniku HUAPP MUS.
Vyrašaje prablemu zatrymanaha chłopca pałkoŭnik milicyi Śviryd.
Da jaho źviarnuŭsia Mikulič Andrej Uładzimiravič, «va ŭpraŭleńni horada pracavaŭ». A da Mikuliča prychodziŭ doktar, «jaki dapamahaŭ mamie jaho ŭ Minskaj abłasnoj balnicy, chirurh vyšejšaj katehoryi».
«Kaža: syn vučycca ŭ kaledžy suviazi. Siońnia ŭ jaho abarona dypłoma, vučycca na adnyja dziaviatki, ni razu da administracyjnaj adkaznaści nie pryciahvaŭsia. Da 20-21 siadzieŭ, rychtavaŭsia da zdačy. Učora vyjšaŭ na vulicu ŭ čyrvonych krasoŭkach, jaho chapanuli, skłali na jaho pratakoł. Mały ŭ šoku, baćka ŭ šoku, tam usie ŭ šoku», ‒ raspaviadaje Śviryd Ušakovu.
«Nu, učora ž nijakich akcyj, ničoha absalutna nie było», ‒ dadaje Śviryd. Pry hetym, pavodle słoŭ Ušakova, było zatrymana 43 čałavieki.
Ušakoŭ kaža, što treba źviazvacca z Kupčeniem i z Padvojskim, načalnikam MHB HUUS Minharvykankama.
Śviryd telefanuje Kupčeniu. Raspaviadaje, što chłopiec vychodziŭ uviečary z kaledža, jaho zatrymali, a «ŭ małoha adzinaje što — heta čyrvonyja krasoŭki».
«Pačali jaho zatrymlivać. Tam druhi, nie jon, nie hety Kazłoŭski, a druhi, troški niepryhoža siabie pavioŭ. Nu i na ich skłali pratakolčyki. I zahnali ich u CIP. A ŭ małoha siońnia abarona dypłoma ŭ kaledžy. I baćka tam: «Dy ja hałasavaŭ za prezidenta, dy ja, blin, sumlenny, a tut takaja situacyja». Moža być, možna niešta dzieści možna z hetym małym… Moža da razhladu pad zad nahoj, a my tut užo sa svajho boku prakantralujem jaho prybyćcio na razhlad», ‒ prosić Śviryd.
«Ja pačuŭ. Paznačyŭ ja jaho», ‒ adkazvaje Kupčenia.
Čym skončyłasia historyja, nieviadoma. Treba mierkavać, chłopiec trapiŭ na abaronu dypłoma, pakolki Śviryd hatovy byŭ i «Hrybu telefanavać» [načalniku HUUS Minharvykankama].
Kamientary