Zabarona na prodaž najaŭnaj valuty bankami chutka pryviała da stvareńnia ŭ Rasii cieniavoha valutnaha rynku. U sacsietkach stali zjaŭlacca šmatlikija kanały, hrupy i boty pa abmienie valuty. Bolšaja častka ź ich stvoranaja ci aktyvizavałasia ŭ pieršyja dva tydni sakavika, piša «Kommiersant'».
Jość kanały, jakija publikujuć «aktualnuju infarmacyju ab mahčymych miescach pakupki dalara».
Jość taksama hrupy pa haradach, u jakich ludzi abmieńvajucca infarmacyjaj ab tym, kolki ŭ kaho jość valuty i pa jakim košcie jany hatovyja jaje pradać ci, naadvarot, kolki valuty čałavieku nieabchodna i kolki jon hatovy zapłacić.
Čaściej za ŭsio ŭdzielniki hrup, prapanovy jakich padyšli adzin adnamu, damaŭlajucca pra sustreču ŭ centry horada ŭ adździaleńni banka. Ceńnik dasiahaje 200 rubloŭ za dalar ci jeŭra. Aficyjnyja kursy valut Banka Rasii na 15 sakavika: jeŭra — 127,23 rub., dalar ZŠA — 115,2 rub. U bankach kurs pakupki dalaraŭ dasiahaŭ 111 rub., jeŭra — 117 rub.
«Kali ŭ 1990-ch kožny viedaŭ kropku ŭ horadzie, dzie źbirajucca čornyja mianiały, to ciapier dastatkova prosta nabrać zapyt u pošukavym radku», — adznačaje kiraŭnik prajekta «Za pravy pazyčalnikaŭ» Jaŭhienija Łazarava.
Zhodna z zakonam «Ab valutnym rehulavańni i valutnym kantroli», niezakonnaj ličycca kupla i prodaž valuty biez udziełu ŭpaŭnavažanych bankaŭ. «Za niezakonnyja valutnyja apieracyi praduhledžana administracyjnaja adkaznaść u vyhladzie štrafu ŭ pamiery ad 75% da 100% ad sumy niezakonnaj valutnaj apieracyi. Takim čynam, parušalniki mohuć stracić usiu valutu, jakuju abmieńvajuć na čornym rynku», — tłumačyć advakat Forward Legal Cimur Tažyraŭ.
Krynicy ŭ pravaachoŭnych orhanach tłumačać, što dziejnaść pa arhanizacyi abmienu valuty u sacsietkach i mesendžarach moža padpaści pad kryminalnuju adkaznaść pa art. 172 KK RF («Niezakonnaja bankaŭskaja dziejnaść», pry najaŭnaści abciažarvajučych abstavinaŭ praduhledžvaje da siami hadoŭ pazbaŭleńnia voli).
Akramia taho, nielehalnyja apieracyi niasuć dla spažyŭcoŭ inšyja ryzyki. Kali abmien budzie adbyvacca ŭ najaŭnaj formie, to mohuć padsunuć falšyŭki abo niedadać pa abumoŭlenym kursie, pieraścierahaje Łazarava. Uładalnika vialikaj sumy mohuć banalna abrabavać. Apieracyi anłajn mohuć abiarnucca nie tolki finansavymi stratami, ale i vykradańniem płaciežnych rekvizitaŭ, padkreślivaje jana. Ale samaja vialikaja ryzyka, dadaje Łazarava, u tym, što kali spažyŭca ašukajuć abo abrabujuć, to pachod u palicyju i jamu samomu pahražaje pryciahnieńniem da adkaznaści.
Ciapier čytajuć
«Lena 20 rubloŭ» uziałasia za staroje: znakamitaja machlarka znoŭ razvodzić davierlivych biełarusaŭ9
Kamientary