Ułady Maryupala: Rasijskija vojski ekshumujuć cieły cyvilnych, pachavanych u haradskich dvarach
U Maryupali rasijskija vajskoŭcy pačali ŭskryvać mahiły miascovych žycharoŭ, pachavanych u dvarach žyłych kvartałaŭ.
Pra heta paviedamiła haradskaja rada Maryupala sa spasyłkaj na ludziej, jakija zastalisia ŭ horadzie.
«Rasijskija vojski pačali praces ekshumacyi ciełaŭ, jakija byli pachavanyja ŭ dvarach žyłych damoŭ. Bolš za toje, jany zabaraniajuć pachavańnie zabitych imi ludziej. U kožnym dvary pastavili svajho nahladčyka, jaki nie dazvalaje maryupalcam addać ziamli svaich pamierłych rodnych ci znajomych», — paviedamlaje harrada.
Navošta pravodzicca ekshumacyja i kudy buduć nakiravanyja cieły, nieviadoma.
6 krasavika haradskaja rada Maryupala paviedamiła, što ŭ horadzie pačali pracavać mabilnyja krematoryi, z dapamohaj jakich rasijskaja armija nibyta sprabuje schavać kolkaść zabitych mirnych žycharoŭ. Pa danych hałoŭnaha ŭpraŭleńnia raźviedki Minabarony Ukrainy, u Maryupali pracujuć 13 mabilnych krematoryjaŭ.
Haradskaja rada Maryupala śćviardžała, što da źniščeńnia ciełaŭ zahinułych pryciahnuli miascovych žycharoŭ, jakija pahadzilisia supracoŭničać z rasijanami, i ludziej z «DNR». Kaardynavać ich dziejnaść nibyta daručyli miascovamu prarasijskamu palityku Kanstancinu Ivaščanku, jakoha na pačatku krasavika abviaścili meram Maryupala.
Kamientary