Niderłandy pastaviać va Ukrainu ciažkaje ŭzbrajeńnie. Rumynija ŭ pracesie
Pra namier pastavić Ukrainie ciažkuju zbroju napisaŭ premjer-ministr Niderłandaŭ Mark Rute pa vynikach razmovy z Uładzimiram Zialenskim. A Rumynija śpiecyjalna pad pieradaču zbroi sa svaich zapasaŭ mianiaje nacyjanalnaje zakanadaŭstva.
«Padčas razmovy z Uładzimiram Zialenskim ministr abarony i ja vykazali našu padtrymku Ukrainie ŭ suviazi z pačatkam novaha nastupleńnia Rasii. Niderłandy buduć pastaŭlać Ukrainie bolš ciažkuju techniku, u tym liku braniatechniku. Razam z sajuźnikami my razhladajem mahčymaść pastaŭki dadatkovaj ciažkaj techniki», — napisaŭ Mark Rute ŭ Tvitary.
Taksama stała viadoma, što ŭzbrajeńnie z reziervaŭ niekatorych ustanoŭ sistemy nacyjanalnaj abarony źbirajecca pieradać Ukrainie Rumynija. Pra heta piša rumynskaja hazeta Romanialibera.
Heta rašeńnie stanie mahčymym dziakujučy uniesienym papraŭkam u rumynskaje zakanadaŭstva. Dla hetaha Minabarony krainy raspracavała nadzvyčajnuju pastanovu. U tekście jaje prajekta naŭprost adznačana, što jana nieabchodnaja ŭ kantekście vajennaha ŭvarvańnia Rasii va Ukrainu.
Siońnia zakanadaŭstva Rumynii nie dazvalaje joj pieradavać zbroju z vajskovych reziervaŭ krainam, jakija nie źjaŭlajucca členami NATA. Akurat heta źmienami ŭ zakanadaŭstvie chočuć vypravić.
Jak piša hazieta, chutčej za ŭsio Ukrainie prapanujuć zbroju vytvorčaści byłoha SSSR, jakoj ukrainskija vajskoŭcy vydatna ŭmiejuć karystacca.
Kamientary