Śpis piśmieńnikaŭ, čyje knihi treba prybrać sa školnych biblijatek, — ci sapraŭdny jon? Mahčyma, nie
Biełaruskaja Rada kultury zajaviła, što źjaviŭsia śpis piśmieńnikaŭ, tvory jakich patrabujecca prybrać sa školnych biblijatek. Usie zhadanyja aŭtary ŭvachodzili ŭ Sajuz biełaruskich piśmieńnikaŭ. Ci nasamreč ciapier začyščajuć biblijateki ad hetych knih?
«Naša Niva» daviedałasia pra situacyju ŭ niekalkich biblijatekach. Ni ŭ adnu ź ich taki list nie prychodziŭ i vusny zahad nie spuskaŭsia. Pry hetym tvory Śviatłany Aleksijevič u niekatorych škołach sapraŭdy raniej ź biblijatek prybrali.
Śpis apublikavała Biełaruskaja Rada kultury. «Nam viadoma pra dva vypadki, kudy pryjšli takija śpisy. Vyhladaje, što pakul heta inicyjatyva abłasnoha ŭzroŭniu, jakaja pa vosieni moža pašyrycca. Bolš ničoha ŭ metach biaśpieki paviedamić pakul nie možam», — skazaŭ «Našaj Nivie» jaje zasnavalnik Siarhiej Budkin.
U aficyjnym Sajuzie piśmieńnikaŭ kažuć, što pra źniaćcio z palic školnych biblijatek biełaruskich aŭtaraŭ nie čuli.
«Nie moža takoha być. Ja nie ŭ kursie. Čamu mahli źniknuć knižki? Tolki kali jany staryja, vyjšli z karystańnia pa estetyčnych pryčynach, paciortyja, to mianiajucca na novyja. Vy zapytajciesia ŭ taho, chto vam pra heta skazaŭ», — adkazaŭ Michaił Paźniakoŭ, staršynia Minskaha haradskoha adździaleńnia hetaha sajuza.
Što źviartaje ŭvahu ŭ hetym śpisie, aproč taho, što imiony niekatorych piśmieńnikaŭ pryviedzieny z pamyłkami?
(Paeta Andreja Chadanoviča zapisali Chadasievičam, a Halinu Karžanieŭskuju — Karžnieŭskaj.)
Amal usie — aŭtary-sučaśniki. Skažam, litarataraŭ-praciŭnikaŭ łukašyzmu, jakija pamierli da 2020 hoda, u śpisie niama (u 2018-m nie stała tolki Alesia Rybaka). Jość, zatoje, Aleś Razanaŭ i Anatol Viarcinski, jaki pamierli za apošni hod.
Sam Sajuz biełaruskich piśmieńnikaŭ likvidavali vosieńniu 2021 hoda.
Dva hetyja fakty śviedčać, što apublikavany śpis moh być składzieny nie ciapier, a ŭ pieršaj pałovie 2021 hoda.
Ale i pa stanie na hod tamu nie ŭsio tam dakładna. Tak, Alhierd Bacharevič vyjšaŭ z Sajuza biełaruskich piśmieńnikaŭ jašče ŭ 2011 hodzie, a tut jon paznačany jak člen sajuza.
Da jakoj ža vysnovy my prychodzim? My schilnyja dumać, što hetaja papiera, kali jana sapraŭdnaja, — pieralik piśmieńnikaŭ, jakich nie rekamiendavałasia zaprašać na sustrečy ŭ škoły.
Prosim našych čytačoŭ sa škoł paviedamić, kali našy vysnovy pamyłkovyja. Pišycie ŭ Telehramie ŭ naš biaśpiečny @Nasa_Niva_Bot.
Čytajcie taksama:
Hazieta Łukašenki nazvała Aleksijevič «bolnoj žienŝinoj» i «staroj duroj»
«Pazicyja nie apazicyjnaja, a adzina pravilnaja». Što viadoma pra dyrektara miedcentra, jakoha abvinavacili ŭ supracoŭnictvie z Bajpołam
Ciapier čytajuć
U Francyi ad śpioki zahinuŭ dalnabojščyk z Dokšycaŭ8
Kamientary