Upieršyniu za 30 hadoŭ u Biełastoku nie nabraŭsia biełaruskamoŭny pieršy kłas
U biełastockaj škole №4 nie nabraŭsia kłas z achvotnych vučycca pa-biełarusku. Takoha nie było amal treć stahodździa. Tak stałasia praz polskaje zakanadaŭstva. Jano nie ŭličvaje dziaciej uciekačoŭ biez hramadzianstva, tamu biełaruskaja mova nibyta nie zapatrabavanaja, paviedamiła «Radyjo racyja» nastaŭnica škoły Alina Vaŭraniuk.
— Užo niekalki hadoŭ ja pačynaju novy hod ź vialikaj cikavaściu. Cikava, jakija dzieci pryjduć, chto zastaniecca na hetych urokach, a chto nie. U hetym hodzie mienšaja cikavaść, bo pieršaha kłasu ŭ mianie nie budzie, bo niama dziaciej, jakija buduć u pieršym kłasie ŭ našaj škole vyvučać biełaruskuju movu. Heta pieršy raz za 30 hadoŭ, kali nie znajšłosia achvotnych na biełaruskuju movu, — raspaviała Alina Vaŭraniuk.
Navučańnie ŭ Polščy arhanizuje Ministerstva adukacyi i navuki.
— Pavodle zakonaŭ, heta było z samaha pačatku, navučańnie biełaruskaj movy viadziecca jak navučańnie movy biełaruskaj mienšaści. Na zaniatki chodziać tolki i vyklučna dzieci ź mienšaści, u jakich baćki majuć polskaje hramadzianstva. Hramadzianstva heta adno, a nacyjanalnaść — užo inšaja sprava. Raniej hetaha nichto nie pilnavaŭ, chadzili dzieci ŭciekačoŭ ź Biełarusi, chadzili na zaniatki biełaruskaj movy, i nie było nijakich prablem. Ale ŭžo ŭ minułym navučalnym hodzie pačali da hetaha pryhladacca. Pakolki ŭ Polščy isnuje takaja sistema infarmacyi, polskaja abrevijatura SIO, tam usio bačna. Kali ŭ dziciaci i baćkoŭ niama hetaha peselu (asabisty identyfikacyjny numar — NN), jano jak by nie ŭvachodzić u hetuju sistemu navučańnia.
Polski ŭrad dafinansoŭvaje movu nacyjanalnym mienšaściam, tym, u jakich polskaje hramadzianstva.
Alina Vaŭraniuk miarkuje, što možna pasprabavać vyrašyć prablemu.
— Kali majem tak mnoha hetych dziaciej [biełaruskich uciekačoŭ], a ich vielmi šmat u Biełastoku, to kali naźbirajuć ludziej, podpisy za heta, hetuju movu i navučańnie možna arhanizavać nie jak movu nacyjanalnaj mienšaści, a prosta jak movu ludziej, jakija taksama ŭ hetym horadzie pracujuć i płaciać padatki i h.d. Čamu nie dapamahać žycharam svajho horada? Dumaju, što kali b achvotnyja biełarusy napisali list, zajavu, naźbirali šmat podpisaŭ, bo heta ad taho zaležyć.
Kamientary