Pavieł Duraŭ papiaredziŭ prapahandysckija kanały, jakija zaklikajuć da hvałtu, što cackacca ź imi nie buduć
Telegram pa patrabavańni Apple zabłakavaŭ na iPhone / iPad niekalki źviazanych ź Biełaruśsiu ruskamoŭnych kanałaŭ sumarnaj kolkaściu ŭ 80 tysiač padpisčykaŭ, zajaviŭ stvaralnik miesiendžara Pavieł Duraŭ. I paraiŭ tym uładalnikam, chto pradukuje padobny kantent i da papiaredžańniaŭ stavicca pabłažliva, nie spadziavacca na siłu ŭłasnaha nachabstva.
«Administratary jašče niekalkich padobnych kanałaŭ ahulnaj kolkaściu ŭ 50 tysiač padpisčykaŭ atrymali papiaredžańni ad našaj kamandy ab tym, što jany parušajuć praviły Apple.
Administratary kanałaŭ pavinny maksimalna surjozna ŭsprymać padobnyja papiaredžańni i imknucca rabić usio mahčymaje, kab dapuščanyja parušeńni nie paŭtaralisia. Inakš ich kanały buduć niepaźbiežna zabłakavanyja ŭ viersijach Telegram, jakija raspaŭsiudžvajucca praz App Store i Google Play.
Ucioki ŭ inšyja mabilnyja prykładańni nie dapamohuć im paźbiehnuć abmiežavańniaŭ dostupu, bo luboje inšaje mabilnaje prykładańnie hetak ža sama, jak i Telegram, budzie abaviazana vykonvać praviły kram prykładańniaŭ.
U lepšym vypadku kanały-parušalniki zastanucca dastupnyja ŭ veb-viersijach i viersijach Telegram, zapampavanych napramuju z telegram.org, adnak heta nie zakranie tych kanałaŭ, jakija parušać praviły samoha Telegram, a nie praviły Apple abo Google.
Naprykład, učora paśla paŭtornaha parušeńnia my byli vymušanyja vydalić ruskamoŭny kanał, jaki zaklikaŭ «rezać» i «rasstrelvać» biazzbrojnych biezabaronnych ludziej.
Paśla taho, jak našy maderatary schavali prablemny post i adpravili administrataram kanała apaviaščeńnie ab niedapuščalnaści padobnaha kantentu, uładalniki kanała apublikavali toje ž paviedamleńnie znoŭku, zabiaśpiečyŭšy jaho skrynšotam z atrymanym imi papiaredžańniem.
Tak rabić nikoli nie varta — praviły Telegram naŭprost zabaraniajuć publičnyja zakliki da hvałtu. Paŭtornaje parušeńnie amal niepaźbiežna pryvodzić da vydaleńnia kanała», — zajaviŭ Duraŭ.
Ciapier čytajuć
Siarhiej Cichanoŭski pierabraŭsia žyć u Łos-Andželes66
Kamientary