Na śpinie, žyvacie ci na baku? Navukoŭcy nazvali najlepšyja pozy dla snu
Hłyboki i spakojny son maje vialikaje značeńnie dla našaha samaadčuvańnia. Ale ci viedajecie vy, što i vaša poza padčas snu maje značeńnie? Voś što kaža navuka.
Mała chto śpić u adnoj pozie ŭsiu noč. Hetaj temie było pryśviečanaje daśledavańnie, u jakim udzielničali 664 čałavieki. U siarednim 54% usiaho času snu jany lažali na boku, 37% — na śpinie i 7% — na žyvacie. Pozu padčas snu čaściej źmianiali mužčyny, asabliva maładziejšyja za 35 hadoŭ, piša onet.pl.
Niama vysakajakasnych daśledavańniaŭ, jakija dakazvali b, što adny pozy dla snu lepšyja za inšyja. Toje, jakoje pałažeńnie vybrać vam, zaležyć ad vašaha ŭzrostu, vahi, taho, što znachodzicca navokał vas, vašaha ŭzroŭniu aktyŭnaści i taho, ci ciažarnyja vy. Samaje hałoŭnaje — znajści tuju pozu, u jakoj vy dobra vyśpiciesia i, kali majecie niejkuju chvarobu, nie budziecie adčuvać bolu.
Ale ž akazvajecca, što ŭ niekatorych situacyjach jość lepšyja pozy dla snu, a jość takija, jakich lepš paźbiahać.
Vybirajem pozu dla snu
Son na pravym baku moža być drennym vybaram dla ludziej z chvorym straŭnikam, bo takaja poza spryjaje refluksu — zakidvańniu źmieściva straŭnika ŭ stravavod. Straŭnik znachodzicca źleva, tamu, kali vy śpicie na levym baku, bolš imavierna, što źmieściva straŭnika pad uździejańniem siły ciažaru zastaniecca na miescy. Bo refluks uźnikaje, kali źmieściva straŭnika zakidvajecca nazad u stravavod, u vyniku źjaŭlajecca adčuvańnie, nibyta ŭnutry niešta piače — piakotka.
Son na levym baku, u svaju čarhu, moža vyklikać ciažkaści z dychańniem, asabliva ŭ ludziej, jakija majuć apnoe snu. Jość daśledavańnie 2011 hoda, padčas jakoha navukoŭcy vyśviatlali, jakaja poza dla snu vyklikaje ŭ ludziej z apnoe bolš prablem. Vyjaviłasia: son na pravym baku źnižaje častatu vypadkaŭ apnoe ŭ ludziej ź siaredniaj i ciažkaj stupieńniu.
Jašče adno daśledavańnie, ale zroblenaje ŭžo ŭ 2018 hodzie, vyśviatlała suviaź pozy dla snu i stanu serca. Zhodna ź im, ludzi z sardečnaj niedastatkovaściu čaściej śpiać na pravym baku. Vierahodna, heta abarončy miechanizm, jaki dapamahaje im palepšyć pracu serca, chacia naŭrad ci hetyja ludzi pra heta zdahadvajucca.
Dakładna viadoma, što son na žyvacie vyklikaje našmat bolšaje pavyšeńnie ŭnutryvočnaha cisku, čym son na baku. Taki stan pavyšaje, ŭ pryvatnaści, ryzyku hłaŭkomy i niejrapatyi zrokavaha niervu.
Taksama nie sakret, što son tvaram da paduški drenna ŭpłyvaje na skuru. Kali vy pryciskajeciesia tvaram da paduški, skura skručvajecca, raściahvajecca i zmorščvajecca, i ŭsio heta spryjaje źjaŭleńniu marščyn. Lepšy sposab paźbiehnuć hetaha — spać na śpinie, ale, ź inšaha boku, son u hetaj pozie moža vyklikać prablemy z dychańniem.
Kamientary