Maładziečanca za abrazu Karpiankova pakarali «chatniaj chimijaj»
U sudzie Maładziečanskaha rajona byŭ vyniesieny prysud Alaksandru Samalu, jakoha abvinavacili ŭ abrazie pradstaŭnika ŭłady — na toj čas načalnika HUBAZiKa Mikałaja Karpiankova (art. 369 Kryminalnaha kodeksa), paviedamlaje «Viasna».
Spravu razhladaŭ sudździa Dzianis Barejka.
Alaksandr Samal byŭ zatrymany u kancy sakavika 2021 hoda, i paśla vystaŭleńnia abvinavačańnia byŭ vyzvaleny pad padpisku ab niavyjeździe.
Pa materyjałach abvinavačańnia Alaksandr Samal, u kastryčniku 2020 hoda, «majučy namier na publičnuju abrazu pradstaŭnika ŭłady ŭ suviazi z vykanańniem im słužbovych abaviazkaŭ, znachodziačysia pa miescy žycharstva ŭ Maładziečnie, u sacyjalnaj sietcy «Adnakłaśniki» paśla prahladu publikacyi pra načalnika Hałoŭnaha ŭpraŭleńnia pa baraćbie z arhanizavanaj złačynnaściu i karupcyjaj MUS Respubliki Biełaruś Mikałaja Karpiankova, naŭmysna raźmiaściŭ abraźlivy kamientar, jaki maje prynižalnuju i nieprystojnuju formu maŭlenčaha vykazvańnia».
Śledstva paličyła, što Samal zrabiŭ heta z pomsty za vykanańnie im słužbovych abaviazkaŭ, pry hetym uśviedamlajučy publičny i źnievažalny charaktar zroblenych vykazvańniaŭ.
Alaksandr pryznaŭ svaju vinu całkam, adnak zajaŭlenuju ŭ sudzie Karpiankovym materyjalnuju pretenziju maralnaj kampiensacyi ŭ pamiery 1000 rubloŭ pryznavać admoviŭsia.
Sud pryznačaŭ Samalu pakarańnie ŭ vyhladzie abmiežavańnia voli biez nakiravańnia va ŭstanovu adkrytaha typu terminam na adzin hod i šeść miesiacaŭ. Taksama pryznaŭ prava ab spahnańni na karyść Karpiankova materyjalnuju kampiensacyju ŭ pamiery 1000 rubloŭ.
Ciapier čytajuć
Ź Ministerstva kultury zvolnili pieršaha namieśnika Markava3
Kamientary