Miniust prapanuje likvidavać partyi, jakija «nie adpaviadajuć kancepcyi nacbiaśpieki»
U Pałacie pradstaŭnikoŭ prajšoŭ kruhły stoł pa pytańniach pryniaćcia novaha zakanadaŭstva ab palityčnych partyjach i hramadskich abjadnańniach. Na mierapryjemstvie vystupiŭ namieśnik ministra justycyi Aleh Kot, jaki prapanavaŭ uvieści ŭ zakanadaŭstva novuju padstavu dla likvidacyi palityčnych partyj. Na jaho dumku, partyi varta likvidoŭvać tady, kali ich dziejnaść nie adpaviadaje kancepcyi nacyjanalnaj biaśpieki, paviedamlaje BiełTA.
Inšyja padstavy dla likvidacyi partyj praduhledžvajucca takija: ažyćciaŭleńnie terarystyčnaj, ekstremisckaj i inšaj zabaronienaj zakanadaŭstvam dziejnaści, naniasieńnie škody dziaržaŭnym albo hramadskim intaresam, atrymańnie hrašovych srodkaŭ i inšaj majomaści z zamiežnych krynic.
Na praciahu paŭhoda paśla ŭstupleńnia ŭ siłu novaha zakona ab palityčnych partyjach usie jany pavinny buduć prajści pierarehistracyju, prapanuje Miniust.
Viedamstva nahadała i pra inšyja abmiežavańni dla partyj: ich nazva i simvolika nie pavinny słužyć metam prapahandy vajny, terarystyčnaj, ekstremisckaj i inšaj zabaronienaj dziejnaści albo jakaja dapuskaje mahčymaść jaje ažyćciaŭleńnia.
Pakolki ŭsio pieraličanaje dziaržaŭnymi orhanami traktujecca vielmi advolna i šyroka, možna nie sumniavacca, što novy zakon budzie vykarystany dla likvidacyi ŭsich apazicyjnych partyj, jakija i biez taho pry ciapierašnich abstavinach faktyčna pazbaŭlenyja mahčymaści pravodzić choć by jakuju realnuju dziejnaść.
Kamientary