Cichanoŭskaja zaklikała suśvietny biznes padtrymać biełaruskija ŚMI
Hetamu pryśviečana jaje kałonka ŭ vydańni Politico, apublikavanaja siońnia.
U materyjale jana pieraličvaje prykłady pieraśledu biełaruskich niezaležnych ŚMI Alaksandram Łukašenkam i siłavikami. Cichanoŭskaja zhadvaje kryminalnyja spravy i sudy nad supracoŭnikami Tut.by, žurnalistami «Biełsata» i inšymi.
«Pa padlikach Biełaruskaj asacyjacyi žurnalistaŭ, za apošnija niekalki hadoŭ krainu pakinuła bolš za 400 žurnalistaŭ. I, prynamsi, 33 rabotniki ŚMI znachodziacca za kratami», — adznačyła Cichanoŭskaja.
Jana taksama źviarnuła ŭvahu na toje, što padtrymka Alaksandra Łukašenki maje vyrašalnaje značeńnie dla stratehii Rasii suprać Ukrainy. Na jaje dumku, pakul Łukašenka vystupaje ŭ jakaści satelita Uładzimira Pucina, «baraćba Ukrainy za svabodu budzie našmat ciažejšaja».
«Adzin sa sposabaŭ, jak astatni śviet moža dapamahčy ciapier, — heta padtrymać vyhnanyja biełaruskija ŚMI. Na hetym tydni ja sustrakajusia ź lidarami suśvietnaha biznesu ŭ Davosie i zaklikaju ich padtrymać niezaležnyja biełaruskija haziety, ličbavyja vydańni, radyjostancyi i telekanały dachodami ad rekłamy i padpiski. Niezaležnyja ŚMI — krynica žyćciovaj siły demakratyi, i vielmi važna, kab hramadzianie Biełarusi mieli dostup da faktaŭ. Alternatyva im — šmathadzinnaja łukašenkaŭskaja prapahanda, jakaja nieadnarazova tranślavałasia ŭ dziaržaŭnych ŚMI», — napisała Cichanoŭskaja.
Jana padkreśliła, što ź nieciarpieńniem čakaje dnia, kali sapraŭdnaja svaboda ŚMI vierniecca ŭ Biełaruś.
Kamientary