Apublikavanaja prahrama «Biełaj Rusi» trochi adroźnivajecca ad prajekta. Ale źmieny nadta krasamoŭnyja
«Biełaja Ruś» apublikavała svaju prahramu. U zaćvierdžanaj prahramie, u paraŭnańni z raniej apublikavanym prajektam, zjavilisia dźvie pryncypovyja źmieny, zaŭvažyŭ «Sputnik».
U novaj apublikavanaj prahramie naŭprost havorycca, što «Biełaja Ruś» abjadnoŭvaje prychilnikaŭ Łukašenki.
«BP «Biełaja Ruś» pazicyjanuje siabie jak abjadnańnie prychilnikaŭ Pieršaha Prezidenta Biełarusi Alaksandra Łukašenki, jakoje imkniecca zachavać i raźvić jaho idei i pryncypy pabudovy suvierennaj biełaruskaj dziaržavy», — tak napisana ŭ prahramie, raźmieščanaj na sajcie partyi.
U prajekcie prahramy Łukašenka nie zhadvaŭsia.
Taksama ŭ prajekcie adnoj z ekanamičnych met było zajaŭlena «likvidavańnie zaležnaści ad źniešnich rynkaŭ, u pieršuju čarhu ad pastavak vuhlevadarodnaj syraviny». U kančatkovaj redakcyi frazu ab vuhlevadarodach prybrali. Havorycca tolki pra ustaranieńnie zaležnaści ad niehatyŭnych źniešnich faktaraŭ i dyviersifikacyju ekspartnych patokaŭ.
Novaja prałukašenkaŭskaja partyja była zasnavanaja na zjeździe 18 sakavika 2023 hoda ŭ Minsku na bazie respublikanskaha hramadskaha abjadnańnia «Biełaja Ruś». Staršynioj abrali Aleha Ramanava, jaki da hetaha ŭznačalvaŭ zhadanuju hramadskuju arhanizacyju. Taksama ŭ niadaŭnim minułym jon byŭ rektaram Połackaha dziaržuniviersiteta.
Jak śćviardžajuć ułady, u novaj partyi — kala 16 tysiač siabroŭ.
Kamientary