Ukraina zaniała 13 kvadratnych kiłamietraŭ na froncie za čas buntu Pryhožyna
Uzbrojenyja siły Ukrainy prasunulisia na 13 kvadratnych kiłamietraŭ na adnym z kirunkaŭ frontu za čas buntu Jaŭhiena Pryhožyna ŭ Rasii, vynikaje z karty prajekta DeepState. Pośpiechi Ukrainy na hetym kirunku paćviardžajuć USU i blizki da Minabarony RF kanał «Rybaŕ», piša «Ahientstvo».
Namieśnik ministra abarony Ukrainy Hanna Malar viečaram 24 červienia paviedamiła, što Uschodniaj hrupoŭcy vojskaŭ udałosia prasunucca ŭ napramku Arechava-Vasileŭki, Bachmuta, Bahdanaŭki, Jahadnaha, Klaščyjeŭki i Kurdziumaŭki.
Karta analityčnaha prajekta DeepState paćvierdziła prasoŭvańnie na 1,5 kiłamietra ŭ rajonie Arechava ŭ bok Rabocina i na 11 kiłamietraŭ na Uremieŭskim vystupie — u rajonie siołaŭ Pryjutnaje i Makaraŭka. Pavodle źviestak i Malar, i analitykaŭ, rasijskim vojskam za hety čas nie ŭdałosia prasunucca ni ŭ adnym kirunku, niahledziačy na sproby.
Blizki da Minabarony RF telehram-kanał «Rybaŕ» paćviardžaje prasoŭvańnie USU na arechaŭskim učastku frontu, dzie idzie «samy intensiŭny cisk». Jon paćvierdziŭ płošču prasoŭvańnia ŭkraincaŭ na 1,5 kvadratnaha kiłamietra na poŭnač ad Rabocina. Vajenkar śćviardžaje, što na ŭčastak pierakinuta padmacavańnie ŭ vyhladzie śpiecnaza.
Rasijskija vojski ŭ noč na 24 červienia ŭčynili najbujniejšuju za apošnija miesiacy sieryju rakietnych udaraŭ pa Ukrainie, jak paviedamiŭ Instytut vyvučeńnia vajny.
Pavodle źviestak Hienštaba Ukrainy, rasijskija siły zapuścili 40 kryłatych rakiet Ch-101/Ch-555, dzieviać kryłatych rakiet Ch-22 i dźvie kryłatyja rakiety «Kalibr», a taksama dźvie zienitnyja rakiety S-300 i try bieśpiłotniki «Šachied-131/136». USU ŭdałosia źbić bolšuju častku rakiet i dva bieśpiłotniki. Pavodle infarmacyi MUS Ukrainy, adna z rakiet u Kijevie trapiła ŭ 25-paviarchovy dom — try čałavieki zahinuli, 14 paranienyja. Minabarony Rasii paviedamiła, što rakiety trapili va ŭkrainskija centry radyjoelektronnaj vyviedki, abstalavańnie na aeradromie i składy haručaha.
Prajekt Oryx 24 červienia ŭ śpis strat ukrainskaj armii dadaŭ 16 adzinak techniki, rasijskaj — 59 adzinak.
U sieradu premjer-ministr Ukrainy Dzianis Šmyhal paviedamiŭ, što ahulnaja płošča terytoryi, zaniataja USU ŭ časie kontrnastupleńnia, składaje bolš za 113 kvadratnych kiłamietraŭ.
Ciapier čytajuć
A my vam kazali: «nie dumajcie, što heta kapiejki»! Stali viadomyja źviestki, kolki padachodnaha biełarusy Litvy pieraličyli roznym hramadskim strukturam10
Kamientary