Hulec NBA źbirajecca bałatavacca ŭ Kanhres ZŠA. U Turcyi vydadzieny ordar na jaho aryšt
Enies Kanter Frydam źjaŭlajecca praciŭnikam Erdahana.
Były hulec NBA Enies Kanter Frydam raspavioŭ, što razhladaje mahčymaść bałatavacca ŭ Kanhres ZŠA.
«Ja chaču bałatavacca ŭ štacie, dzie bolš za ŭsio ceniać svabodu, a taksama dzie šmat sonca i plažaŭ (vidać, majecca na ŭvazie Kalifornija. — «NN»).
Mnie jašče rana bałatavacca, bo ciapier, na žal, naša kraina mocna padzielenaja. Jak tolki vy traplajecie ŭ palityku, vy hublajecie 50 adsotkaŭ ludziej. Tamu, kali pryjdzie čas, ja abaviazkova padumaju pra heta, moža być, u 2026-m ci 2028-m, chutčej — u 2028-m.
Kožny raz, kali ja prychodžu na Kapitalijskaje ŭzvyšša pa pracy, usie kažuć: «Čaho ty čakaješ? Nam patrebna vaša mierkavańnie. Daniasi svajo mierkavańnie da Kanhresa abo Sienata i paspryjaj vielizarnym źmienam». Takim čynam, ja budu bałatavacca, ale dumaju, što ciapier jašče zanadta rana», — cytuje słovy Eniesa Sports.ru.
Enies Kanter Frydam maje tureckaje pachodžańnie. Jon naradziŭsia ŭ 1992 hodzie ŭ Ciurychu, karjeru pačynaŭ u stambulskim «Fienierbachče», a potym źjechaŭ u NBA. Apošni kłub, za jaki jon hulaŭ, byŭ «Bostan Siełtyks». Vystupaŭ taksama za zbornuju Turcyi.
U junactvie Kanter zachapiŭsia rucham «Chiźmiet», zasnavanym relihijnym prapaviednikam Fietchułacham Hiulenam. Paśla sproby dziaržaŭnaha pieravarotu ŭ lipieni 2016 hoda, u arhanizacyi jakoha byli abvinavačanyja prychilniki Hiulena, baćka Eniesa Miechmiet Kanter vystupiŭ z adkrytym listom, u jakim adroksia syna, prasiŭ jaho źmianić proźvišča i vybačyŭsia pierad Erdahanam. Baskietbalist u liście ŭ adkaz taksama adroksia rodnych.
20 maja 2017 hoda pašpart Kantera byŭ anulavany ŭradam Turcyi, praz šeść dzion byŭ vydadzieny ordar na jaho aryšt, Kanter byŭ abvieščany členam «terarystyčnaj hrupoŭki», jaki byŭ abaviazany źjavicca ŭ Turcyju dla suda pad pahrozaj pazbaŭleńnia hramadzianstva. U 2021-m jon atrymaŭ hramadzianstva ZŠA.
U sakaviku 2022 hoda Enies Kanter Frydam vykazaŭsia nakont situacyi ŭ Biełarusi.
Enies nazvaŭ Alaksandra Łukašenku «samaabranym dyktataram», jaki dapamahaje Pucinu ŭ vajnie, i zaklikaŭ raspaŭsiudzić usie sankcyi suprać Rasii i na Biełaruś.
«Jon uciahnuŭ narod Biełarusi ŭ vajnu, jakoj narod nie choča», — napisaŭ spartsmien.
Ciapier čytajuć
«Ad biazvychadnaści źjeździŭ u Biełaruś, dzie jamu zrabili apieracyju». Pabracim raskazaŭ, što viadoma pra aryštavanaha kalinoŭca Andreja Siarhiejeva12
«Ad biazvychadnaści źjeździŭ u Biełaruś, dzie jamu zrabili apieracyju». Pabracim raskazaŭ, što viadoma pra aryštavanaha kalinoŭca Andreja Siarhiejeva
Novyja detali źniknieńnia Anatola Kotava. Jachta ź im źmianiła kurs na Abchaziju, dzie jaho vyvieli supracoŭniki FSB. Ale vykradańnie ci insceniroŭka?3131
Kamientary