Biełaruś z pačatku hoda adpraviła 8,5 miljona ton hruzaŭ praz rasijskija party
Biełaruś vykarystoŭvaje dla pieravałki svaich ekspartnych hruzaŭ 20 rasijskich partoŭ. U studzieni—žniŭni praź ich byli adpraŭlenyja 8,5 młn t, takija źviestki pryvioŭ u efiry ANT ministr transpartu i kamunikacyj Alaksiej Lachnovič, piša Reform.by.
«Siońnia my pracujem praz 20 partoŭ Rasijskaj Fiederacyi. Najbolš zapatrabavanyja — party Leninhradskaj vobłaści i Sankt-Pieciarburha (paradku 75—80% hruzaŭ)», — skazaŭ jon.
Pavodle jaho, novyja maršruty vystrojvalisia litaralna ŭručnuju.
«Faktyčna ŭručnuju my kiravali hetymi pracesami, damaŭlalisia z Rasijaj, i byli padpisanyja dva vielmi surjoznyja dakumienty. Kali letaś my pieravalili praz party RF blizu 6,1 młn t, to pavodle vynikaŭ 8 miesiacaŭ hetaha hoda bačym statystyku bolš za 8,5 młn t», — skazaŭ jon.
Lachnovič taksama adznačyŭ, što taksama pieravozki aktyŭna viaducca čyhunačnym transpartam u napramku Kitaja. Pavodle jaho słoŭ, pierabudova łahistyki adbiłasia i na płanach Ministerstva pa rekanstrukcyi daroh.
«Raniej my čaściej jeździli na Jeŭropu, a zaraz źjaviłasia patreba ŭ novym kalidory na Sankt-Pieciarburh. Havorka idzie pra aŭtadarohu R46 Lepiel — Połack — miaža RF. Sioleta my prystupili da rekanstrukcyi darohi ad Połacka da Lepiela. Akramia hetaha, ad Połacka da miažy RF pačaty kapitalny ramont hetaj darohi, zaviaršyć jaki my płanujem u 2024 hodzie z pavieličeńniem nahruzki na voś», — skazaŭ jon.
Usiaho ŭ nastupnym hodzie płanujecca vyłučyć na ramont i rekanstrukcyju daroh 2,2 młrd rubloŭ i «zrabić bolš za 4 tys.km daroh».
Kamientary