«Ja ž vielmi mocna lublu Łukašenku». Žłobinskaja piensijanierka paskardziłasia na miascovuju milicyju i trapiła ŭ IČU
Uviesnu 2023 hoda Žłobinski rajonny sud pryznačyŭ administracyjny štraf prychilnicy Łukašenki. Da suda piensijanierku ŭtrymlivali ŭ IČU jak palityčnuju pravaparušalnicu, piša «Fłahštok».
Padrabiaznaści niezvyčajnaha administracyjnaha pracesu raspaviała «Fłahštoku» žycharka Žłobina Alina, jana apynułasia ŭ adnoj kamiery ź piensijanierkaj viasnoj 2023 hoda.
— Da nas pasadzili babulu 70 hadoŭ — Jevu. Jana raspaviała, što nazvała ŭ svaim videa na svajoj staroncy ŭ sacyjalnaj sietcy našaha byłoha načalnika milicyi słužbovym złačyncam, tamu što jon nijak nie reahavaŭ na jaje zvaroty.
Joj patelefanavali z prakuratury pad markaj padpisać niejkija dakumienty. Nibyta jany razabralisia. Babula pryjšła i jaje zatrymali.
U pracesie razmovy vyśvietliłasia, što piensijanierka zjaŭlajecca prychilnicaj Łukašenki.
— Babula raskazvała: «Ja ž vielmi mocna lublu Łukašenku. Ja prymała ŭsie papraŭki, jakija byli. Jak tak mianie mahli pasadzić da suda?»
Niahledziačy na svaju luboŭ da Łukašenki, jana, jak i ja, spała biez matraca. Nie było pakładziena ničoha. Śviatło ŭ kamiery z-za nas dvaich nie vyklučali. Vadzili ŭ kajdankach i skručvali łastaŭkaj tvaram u padłohu. Mianie i babulu.
«Fłahštok» znajšoŭ videazvaroty žłobinskaj piensijanierki. Zatrymanaj akazałasia Jeva Piskun sa Žłobina. Z zapisaŭ možna zrazumieć, što historyja pačałasia ŭletku 2022 hoda, kali žančyna pryjechała ŭ Homiel na azdaraŭleńnie.
U adnoj z pajezdak u haradskim transparcie joj upieršyniu trapiŭsia aŭtobus biez kanduktara. Kupiŭšy bilet u kiroŭcy, jana nie viedała, što jaho nieabchodna kampastavać. Kantralor, jaki zajšoŭ u aŭtobus, vypisaŭ joj štraf. Štraf byŭ apłačany, ale, na dumku žančyny, niepravamocna, i jana źviarnułasia z patrabavańniem viarnuć hrošy.
U studzieni 2023 hoda Jeva Piskun zapisała videazvarot, u jakim raskazała, što supracoŭniki milicyi nie chočuć jaje słuchać.
«Vałakita i biurakratyzm, niepiśmiennaść. U nas Łukašenka patrabuje: nie vykručvajcie ruki ludziam, staŭciesia surjozna da składańnia ŭsich dakumientaŭ, usich pracedur, administracyjnych u tym liku. Łukašenka pracuje asobna, a ŭsie astatnija słužby pracujuć asobna. Čamu taki harmidar u krainie tatalny?»
Žančyna ŭ videa taksama paviedamlała, što kiraŭnik Žłobinskaha RAUS Hienadź Mielnik «chavajecca ad ludziej», i što pry jaho maŭklivaj zhodzie «składajucca fiktyŭnyja administracyjnyja pratakoły, spyniajucca administracyjnyja materyjały».
Naprykancy žančyna zaklikała da kadravych čystak u struktury rajonnaha RAUS.
U svaich videazvarotach žančyna padkreślivała, što adrasuje skazanaje Łukašenku.
«Fłahštok» pahavaryŭ sa znajomym piensijanierki.
Na ŭmovach ananimnaści jon paviedamiŭ, što paśla ździekaŭ u izalatary Jeva znachodzicca ŭ šoku. Sud pryznačyŭ joj vializny štraf, jaki jana nie viedaje, jak vypłacić.
A Hienadź Mielnik bolš nie ŭznačalvaje Žłobinski RAUS. Pa źviestkach «Fłahštok», jon atrymaŭ pavyšeńnie ŭ Śledčym kamitecie ŭ Homieli.
Ciapier čytajuć
«Ja nie sustrakaŭ nivodnaha vajskoŭca, chto b nie pavažaŭ Drapataha»: na čale USU staŭ kamandzir novaha pakaleńnia. Što ŭjaŭlaje saboj Michaił Drapaty?4
Kamientary