Biełarus zamoviŭ pientahramy kala kvater rasijskich prapahandystaŭ? «Pahrozy rasijskich prapahandystaŭ mianie chvalujuć vielmi mała»
Učora kala maskoŭskaj kvatery rasijskaha prapahandysta-vajenkara Valancina Trušnina namalavali pientahramy sa śvinymi hałovami. Paviedamlajecca, što zamoŭca — biełarus Ivan Voŭčyk. «Naša Niva» raspytała jaho, što heta było i čamu.
Za namalavanyja pientahramy z hałovami śviniej u Maskvie zatrymali 25-hadovuju dziaŭčynu i 28-hadovaha mužčynu. Suprać ich zaviali kryminalnuju spravu za «pahrozu zabojstvam» i «vandalizm». Tyja pryznalisia, što zakaz atrymali praz ukrainski čat-bot.
Rasijskaja prapahanda paviedamiła, što zamoŭcam byŭ 32-hadovy Ivan Voŭčyk — biełarus, jaki žyvie ŭ Kijevie.
«Iźviestija» sa spasyłkaj na svaju krynicu napisali, što Voŭčyk taksama datyčny da pahroz vajenkaru Uładzisłavu Šuryhinu. 19 vieraśnia tamu patelefanavali ź nieviadomaha numara i paviedamili, što na jaho dom naviedzieny bieśpiłotnik.
«Naša Niva» daviedalisia krychu bolej pra mužčynu. Vučyŭsia jon u Biełaruskim instytucie pravaznaŭstva na jurysta. Paśla pracavaŭ videohrafam u Minsku, taksama fatahrafavaŭ i prapanoŭvaŭ pasłuhi dyzajniera. Uviesnu 2021-ha mužčyna vyjechaŭ ź Biełarusi va Ukrainu, ratujučysia ad palityčnaha pieraśledu.
«Naša Niva» adšukała Ivana i zapytałasia, ci sapraŭdy jon zamaŭlaŭ pientahramy kala kvatery Trušnina i ci baicca pahroz rasijskaj prapahandy. Toj adkazaŭ žartam:
«Ukrainskija babuli-viadźmarki z horada Kanatopa paprasili mianie znajści ludziej, jakija ŭmiejuć malavać. Jany namalavali pa piaci adrasach takija vitańni ad babul. Voś i ŭsio».
Pad babulami-viadźmarkami Ivan mieŭ na ŭvazie žančyn z Kanatopa, jakija praklinali rasijskich sałdat, što zajechali ŭ horad. Videa ź imi šyroka razyšłosia.
Ivan dadaŭ, što nie viedaje, jak adbiralisia adrasy, pa jakich malavalisia pientahramy.
«A pahrozy rasijskich prapahandystaŭ mianie chvalujuć vielmi mała», — adznačyŭ Ivan Voŭčyk.
«Naša Niva» — bastyjon biełaruščyny
PADTRYMAĆCiapier čytajuć
Histaryčnyja +40,4°C u Pinsku — heta tolki razahreŭ. Biełaruś uvachodzić u novuju klimatyčnuju eru i na vačach stanie lesastepam11
Kamientary