«Kolki ja zmahałasia sa svaimi strachami, kab u vyniku być tut». Što viadoma pra dziaŭčynu, jakaja palacieła ŭ Dubaj z uradavaj delehacyjaj

Dziaŭčyna vučyłasia ŭ słuckaj škole №6. Vyhladaje, što Palina była paśpiachovaj vučanicaj. U 2016 hodzie jana prymała ŭdzieł u rajonnaj alimpijadzie pa hieahrafii i atrymała dypłom treciaj stupieni. U 2017 hodzie Palina z takim samym vynikam vystupała na alimpijadzie pa anhlijskaj movie. Taksama treciaje miesca joj prynios udzieł u druhim etapie respublikanskaj alimpijady pa ruskaj movie i litaratury.

Kali Palina vučyłasia ŭ 9 kłasie, to razam ź jašče adnoj dziaŭčynkaj pisała navukovuju pracu pa biełaruskaj movie i litaratury, jakuju jany pradstaŭlali na rajonnaj kanfierencyi. Tut taksama byŭ dypłom treciaj stupieni.

Pavialičyć

Paśla škoły Palina skončyła jurydyčny kaledž BDU. U toj čas, kali jana była abituryjentkaj jurfaka BDU, jana pabačyła va «Ukantakcie» post pra studentku, jakaja źjaŭlajecca pasłom MUR (rasšyfroŭvajecca jak «mety ŭstojlivaha raźvićcia»), i padumała, što taksama bačyć siabie ŭ hetaj śfiery.

U adnym ź intervju dziaŭčyna adkazvała na pytańni, čamu jana pačała cikavicca mienavita ekałohijaj, a nie pravavoj śfieraj. Palina pažartavała, što daŭno treba było prydumać niejkuju pryhožuju historyju, ale jaje niama.

«Usio pačałosia z prostaj zacikaŭlenaści: čamu na niekatorych tavarach jość adznaka «eka». Pačała źjaŭlacca moda na šopiery — dzieści ŭ 2019 hodzie, a moža i raniej, ale zaŭvažać ja pačała tolki tady, — i paśla pieršaj chvali karanavirusa suśvietnaja supolnaść jašče bolš pačała raspaviadać pra ekałahičnyja prablemy. Tak maja zacikaŭlenaść narastała, ja pačała sama šukać roznyja artykuły ŭ internecie, asabliva na temu płastyka, usio bolš unikać u temu ekałahičnych alternatyŭ adnarazovym rečam, zero waste, sustainable living, fast fashion, prachodzić kursy, stała ŭdzielnikam Zialonaha ŭniviersiteta BDU. A naohuł pačatkam majho ekałahičnaha šlachu ja liču pakupku šmatrazovaj šklanački!»

Zaraz Palina źjaŭlajecca studentkaj treciaha kursa jurydyčnaha fakulteta BDU, i ŭ jaje ŭžo jość peŭnyja dasiahnieńni. U 2021 hodzie dziaŭčynu abrali dubloram pasła MUR 12, i jana pačała ŭdzielničać u roznych mierapryjemstvach, sustrakałasia ź ministrami, pradstaŭnikami AAN i JUNISIEF.

Pavialičyć

Darečy, ź lutaha 2023 hoda Palina aktyŭna supracoŭničaje ź JUNISIEF. Spačatku jana praviała lekcyju pra eka-družalubny ład žyćcia dla vałancioraŭ, potym vystupała ŭ roznych dziciačych letnikach.

Najbolš zapaminalnaj padziejaj leta Palina nazyvaje «Słavianski bazar». Dziaŭčyna žartuje, što spačatku sieła nie na toj ciahnik, bo jechała biez mamy. U Viciebsku Palina praviała lekcyju, padčas jakoj pakazvała, jakimi šmatrazovymi rečami možna zamianić adnarazovyja. Miascovyja babuli byli takija ŭražanyja, što pažadali joj sustreć dobraha žanicha. A paśla dziaŭčyna arhanizavała dla dziaciej majstar-kłas pa malavańni na vadzie.

Pavialičyć

Voś što pisała Palina pierad pajezdkaj u Dubaj: «Dla kahości ja prosta pajedu ŭ Dubaj. Nie! Ja jedu na KANFIERENCYJU, jakaja budzie prachodzić u Dubai. Kolki ŭsiaho było zroblena, kolki ja zmahałasia sa svaimi strachami, kab u vyniku być tam. Ja zaŭsiody ličyła, što nie zmahu havaryć na vialikuju aŭdytoryju, nie zmahu danieści tuju važnuju dumku pra toje, što treba bierahčy Płanietu, bo ja niaŭpeŭnienaja ŭ sabie dziaŭčynka, niachaj tak i budzie.

Ale, ubačyŭšy adnojčy na svaim pieršym vystupie zacikaŭlenyja vočy ludziej, ja zrazumieła, što sapraŭdy mahu zrabić uniosak u zachavańnie našaha ahulnaha doma. Chaj paśla majoj lekcyi ja zacikaŭlu 2-3 čałaviek, ale jany sapraŭdy pačnuć dziejničać na karyść sabie i navakolnamu asiarodździu, za imi padciahnucca siabry, rodnyja… i voś užo ŭ ekałohii zacikaŭleny 5-10 čałaviek! Značyć usio było nie darma! Ja mahu!»

Pavialičyć

Baćka dziaŭčyny zahinuŭ u DTZ u 2018-m. Andrej Žohła byŭ dyrektaram Słuckaha kambinata chlebapraduktaŭ (svajactva paćvierdzili «Kibierpartyzany»). Maci Paliny pracuje dyrektarkaj u terytaryjalnym centry sacabsłuhoŭvańnia nasielnictva ŭ Słucku.

Raniej dziaŭčyna raspaviadała, što joj padabajucca skandynaŭskija filmy i kultura (u pieršuju čarhu za toje, jak skandynavy staviacca da navakolnaha asiarodździa). Jana ličyć siabie krychu viehietaryjankaj i krychu viehankaj.

Lubić zdymać tyktoki i niekatoryja ź ich zapisvaje na biełaruskaj movie.

Čytajcie taksama:

U składzie delehacyi na samit u AAE lotała siabroŭka Koli Łukašenki? — Motolkohelp

• 32
• 0
• 14
• 27
• 2
• 6
• 17
• 1