Polšča apiaredziła ZŠA i Hiermaniju ŭ śpisie najlepšych krain dla emihrantaŭ
Sietkavaja płatforma dla ekspataŭ InterNations pradstaviła svoj tradycyjny rejtynh najlepšych krain dla pierajezdu, składzieny na asnovie apytańnia mierkavańniaŭ karystalnikaŭ i biahučych tendencyj, piša Myfin.by.
U rejtynhu InterNations uličvalisia vyniki padrabiaznaha apytańnia bolš za 12,5 tys. emihrantaŭ z usiaho śvietu. Pad uvahu prymaŭsia ŭzrovień ich zadavolenaści pa piaci pakazčykach: jakaść žyćcia, prostaść uładkavańnia, praca za miažoj, asabistyja Finansy i «asnoŭnyja patreby ekspataŭ», takija jak zdolnaść znachodzić žyllo, aryjentavacca ŭ miascovaj movie i h. d.
Na pieršym miescy rejtynhu apynułasia Panama. Ekspaty chvalać dastupnaść žylla ŭ krainie i lohkaść, ź jakoj jaho možna znajści. Akramia taho, u emihrantaŭ u Panamie mała prablem z movaj, amal usie jany zadavolenyja dostupam da anłajn-servisaŭ i prostaściu atrymańnia vizy.
Druhoje miesca dastałasia Mieksicy — hałoŭnym čynam za lohkaść uładkavańnia ŭ krainie, ahulnuju pryjaznaść miascovaha nasielnictva i mahčymaści dla pošuku siabroŭ, a taksama za adsutnaść prablem pry pryzvyčajvańni da miascovaj kultury.
Zamykaje trojku lidaraŭ Indaniezija, jakaja raduje ekspataŭ nizkimi cenami, pryjaznymi ludźmi i lidziruje pa takim pakazčyku, jak bałans pamiž pracaj i asabistym žyćciom.
U top-10 rejtynhu taksama ŭvajšli Ispanija, Kałumbija, Tajłand, Brazilija, Vjetnam, Filipiny i AAE.
Z susiedziaŭ Biełarusi ŭ śpis trapiła tolki Polšča, raźmiaściŭšysia na 28-m miescy. Pry hetym vyniki mnohich krain, papularnych u mihrantaŭ, akazalisia horšymi: ZŠA — 35-je miesca, Francyja — 38—ie, Vialikabrytanija — 44-je, Kanada — 49-je, Hiermanija — 50-je.
Samym vialikim «niaŭdačnikam» u rejtynhu 2024 hoda stała Finlandyja: jana apuściłasia z 16-ha miesca na 51-je.
U toj ža čas Paŭdniovaja Kareja zdoleła damahčysia samaha značnaha pośpiechu: za hod kraina padniałasia z 50-ha na 23-je miesca, šmat u čym dziakujučy rostu zadavolenaści ekspataŭ u śfiery asabistych finansaŭ.
Kamientary