Dla pachudzieńnia mužčynam i žančynam patrebnyja roznyja pradukty na śniadanak

Ad taho, što my jamo, zaležyć naša zdaroŭje, u tym liku ŭzrovień cukru ŭ kryvi, lišak tłušču i ŭzrovień chalesterynu. Vučonyja praviali šmat daśledavańniaŭ upłyvu roznych dyjet na pachudzieńnie, ale redka źviartali ŭvahu na taki faktar, jak poł.

Na hetym, jak paviedamlaje New Atlas, zasiarodzili ŭvahu daśledčyki z Univiersiteta Vaterłoa ŭ Kanadzie. Vučonyja vykarystali matematyčnuju madel mietabalizmu, jakaja była śpiecyjalna raspracavanaja z ulikam pałavych asablivaściaŭ mužčyn i žančyn.

Hetaja madel dazvoliła imitavać dynamiku klučavych mietabaličnych adkazaŭ na spažyvańnie roznych straŭ, jakija źmiaščajuć źmiešanyja pažyŭnyja rečyvy (vuhlavody, tłuščy i inš.), padčas śniadanku, jaki ličycca samym važnym pryjomam ježy ŭ dzień.

Kab naładzić svaju madel, vučonyja vykarystali danyja z ekśpierymientaŭ, padčas jakich udzielniki spažyvali stravy z vysokim i nizkim utrymańniem vuhlavodaŭ i tłuščaŭ. Heta dazvoliła pierakanacca, što madel dakładna adlustroŭvaje realnyja fizijałahičnyja pracesy ŭ arhaniźmie.

Vyniki, apublikavanyja ŭ časopisie Computers in Biology and Medicine, śviedčać pra toje, što mietabaličnyja adroźnieńni pamiž mužčynami i žančynami byli najbolš prykmietnyja paśla karotkaterminovaha haładańnia.

Paśla niekalkich hadzin haładańnia mietabalizm mužčyn u siarednim lepš reahavaŭ na ježu z vysokim utrymańniem vuhlavodaŭ. Tamu im na śniadanak rekamiendujucca źjadać aŭsianku ci zbožžavyja. A voś žančyny lepš zasvojvajuć tłuščy. Tamu im bolš padyduć amlet ci avakada.

Asnoŭnaj pryčynaj mietabaličnych adroźnieńniaŭ pamiž mužčynami i žančynami źjaŭlajecca roźnica ŭ tym, jak ich piečań i tłuščavaja tkanka zachoŭvajuć i apracoŭvajuć pažyŭnyja rečyvy.

Adna z aŭtaraŭ daśledavańnia prafiesarka prykładnoj matematyki Anita Łejtan adznačyła:

«Pakolki ŭ žančyn u siarednim bolš tłušču, čym u mužčyn, možna było b padumać, što jany spalvajuć mienš tłušču, ale heta nie tak. Daśledavańni pakazvajuć, što žančyny nazapašvajuć bolš tłušču adrazu paśla ježy, ale taksama spalvajuć jaho bolš padčas haładańnia».

Daśledčyki padkreślivajuć, što ich madel moža stać važnaj asnovaj dla stvareńnia piersanalizavanych charčovych stratehij, jakija buduć uličvać pałavyja adroźnieńni i dapamahać palapšeńniu zdaroŭja. Akramia taho, madel budzie karysnaja dla vyvučeńnia mietabaličnych zachvorvańniaŭ i testavańnia lekaŭ, madelujučy mietabaličnyja reakcyi na novyja preparaty.

U budučyni vučonyja płanujuć stvaryć jašče bolš składanyja madeli, jakija buduć uličvać vahu, uzrost i stadyju mienstrualnaha cykłu čałavieka.

• 1
• 1
• 2
• 1
• 1
• 0
• 0
• 0