«Paniaćcia «prabačyć» nie budzie». Ihar Kizim — pra Biełaruś na paślavajennych pieramovach

— Ci pavinna Biełaruś udzielničać u patencyjnych mirnych pieramovach? Kali tak, to ŭ jakim farmacie — praz pradstaŭnikoŭ režymu ci demakratyčnych sił? 

— Pytańnie składanaje. Ja dumaju, heta budzie zaležać ad farmatu pieramoŭ, jaki budzie pryniaty. Pa mienšaj miery, ja nie baču režymu Łukašenki abo Biełarusi ŭ niejtralnaj pazicyi.

Ja baču rolu Biełarusi praz pryzmu adkaznaści za saŭdzieł u ahresii. Takoha paniaćcia, jak «prabačyć», nie budzie. My zafiksavali fakt saŭdziełu ŭ ahresii i zamacavali jaho jurydyčna. Z terytoryi Biełarusi zapuskalisia rakiety, navat kali heta rabili rasijskija vojski. Pavodle ŭsich isnujučych kanviencyj, heta parušeńnie mižnarodnaha prava. Biełaruś stała saŭdzielnikam.

Šmat što budzie zaležyć ad umoŭ, u jakich buduć adbyvacca pieramovy, i ad taho, što dla nas budzie ličycca pieramohaj. Dla nas hałoŭnaje — razam z vami pieramahčy, spynić vajnu i prymusić Rasiju viarnucca ŭ «stojła» mižnarodnaha prava. U jakim farmacie budzie ŭdzielničać Biełaruś ci jaje režym, mienš važna, čym realizacyja hetych met.

— Free Belarus Center u svaim daśledavańni acaniŭ uzrovień stasunkaŭ Ukrainy i biełaruskich demakratyčnych siłaŭ davoli aptymistyčna. Ci karektnaja heta acenka?  

— Ja całkam zhodny, što tam vyznačana pazityŭnaja dynamika. Sam fakt stvareńnia pasady śpiecpradstaŭnika pa supracy ź biełaruskimi demakratyčnymi siłami śviedčyć pra toje, što my pačali bolš-mienš pazityŭny dyjałoh ź biełarusami. My zacikaŭlenyja ŭ supracy z usimi, chto dapamahaje nam pieramahčy našaha voraha — Pucina. Heta naša hałoŭnaja meta.

— A što biełaruskija demakratyčnyja siły nie robiać ciapier, ale mahli b rabić? 

— Biełaruskija demsiły robiać toje, što mohuć. Bačycie, biełaruskija demakratyčnyja siły — heta vielmi šyrokaje paniaćcie. Havaryć ciapier pra niejki adzin centr nielha. Naprykład, Ofis Śviatłany Cichanoŭskaj, nakolki mnie viadoma, vystupaje na mižnarodnych sustrečach u padtrymku Ukrainy i adkryta zajaŭlaje pra važnaść jaje padtrymki. Ale jość i inšaja častka siłaŭ, jakaja vajuje ci akazvaje humanitarnuju dapamohu biełaruskim dobraachvotnikam.

My supracoŭničajem z toj častkaj biełaruskaha hramadstva, jakaja ličyć siabie sajuźnikam Ukrainy, moža, i časovym, u baraćbie z rasijskaj ahresijaj. U adroźnieńnie ad aficyjnaha režymu Łukašenki, jaki padtrymlivaje vajnu, pradastaŭlaje terytoryju, zbroju i treniruje rasijskich vajskoŭcaŭ.

— U jakich pytańniach ukrainskaja dziaržava moža pajści nasustrač biełaruskim siłam? 

— My tak pytańnie nie stavim. Davajcie budziem sumlennymi: usio ž taki Ukraina bolš patrabuje dapamohi dla pieramohi nad našym supolnym voraham. Heta, u tym liku, u intaresach biełaruskaha hramadstva. Pa vialikim rachunku, nam patrebnaja dapamoha i fizičnaja, i publičnaja. Nam patrebnyja tanki, zbroja, rakiety. Na žal, biełaruskija demakratyčnyja siły nie vyrablajuć ničoha takoha.

— Ci mahła b Ukraina pajści nasustrač, naprykład, u pytańniach lehalizacyi?

— Heta inšaje pytańnie. Jano nie adnosicca niepasredna da ŭkrainskaj dziaržavy. Hetuju prablemu pavinny vyrašać biełarusy tut. Jość šlachi dla jaje vyrašeńnia. Kali łaska, pracujma.

Tut treba zrazumieć adnu reč vielmi dakładna. Vielmi ciažka adroźnić «drennych» i «dobrych» biełarusaŭ. Biełaruś ci, dakładniej, biełaruski režym uciahnuŭ vašu krainu ŭ vajnu na baku našaha voraha — Rasijskaj Fiederacyi. Staŭleńnie da biełarusaŭ, navat va Ukrainie, nie vielmi pazityŭnaje. Niahledziačy na toje, što biełarusy vajujuć za Ukrainu, usprymańnie Biełarusi, na žal, zastajecca takim, što jana źjaŭlajecca suahresaram. I režym Łukašenki robić usio, kab hetaje ŭsprymańnie zachoŭvałasia. 

• 15
• 5
• 2
• 7
• 0
• 3
• 0
• 0