Ułady vyrašyli ŭparadkavać najstarejšyja hrodzienskija mohiłki. Pryborkaj darožak i placovak trojčy na tydzień zajmajucca supracoŭniki «Śpiecaŭtahaspadarki». Da pracy dałučylisia aktyvisty BRSM i UŽREP Kastryčnickaha rajona, jakija dapamahajuć pryvodzić u paradak zarosłyja mahiły, piša Hrodna.life.
Mohiłki, miarkujučy pa videa telekanała «Hrodno Plus», znoŭ mocna zaraśli.
Vałanciory prybirajuć raślinnaść, jakaja zaminaje ahladać pomniki. Tak stanie zručniej pravodzić ekskursii, raskazaŭ dziaržaŭnamu vydańniu načalnik Hrodzienskaj haradskoj i rajonnaj inśpiekcyi pryrodnych resursaŭ i achovy navakolnaha asiarodździa Andrej Pisanko.
Jak časta buduć pravodzić takija prybirańni, nie ŭdakładniajecca.
Niekropalaŭ na hrodzienskaj vulicy Antonava pa sutnaści dva — Farnyja katalickija i bolš poźnija, pravasłaŭnyja mohiłki. Katalickija byli zakładzieny ŭ 1792 hodzie. Heta najstarejšy kamunalny niekropal Biełarusi. Abodva nie majuć aficyjnaha achoŭnaha statusu. Abaronienyja tolki asobnyja nadmahilnyja pomniki. Pry hetym usiaho na mohiłkach na Antonava kala 8000 pachavańniaŭ, prykładna tysiača — asabliva kaštoŭnyja.
Mnohija pachavańni kanca XIX — pačatku XX stahodździa zastajucca biez nahladu, bo ŭžo nie žyvuć svajaki tych, chto tut pachavany. Pa sutnaści, hetyja mahiły akazalisia nikomu nie prynaležnymi.
Staryja mohiłki ŭ Hrodnie majuć patrebu nie tolki ŭ sistematyčnaj pryborcy, ale i ŭ restaŭracyi, i zachavańni. Pra heta niekalki hadoŭ kazali hramadskija aktyvisty.
Jašče ŭ 2018 hodzie minčuk Andrej Burdzienkaŭ pačaŭ pravodzić na terytoryi katalickaha pachavańnia prybirańni pomnikaŭ i aličboŭvać mahiły. Na heta jon traciŭ svaje hrošy. Pravioŭ niekalki vałanciorskich tałok, ale ludziej na ich prychodziła mała. U niejki momant jany spynilisia.
Ekskursavody, jakija šmat hadoŭ vodziać hrupy pa mohiłkach, adznačali tryvožnuju tendencyju: z pachavańniaŭ źnikajuć čyhunnyja pomniki. Pryčym časta heta adbyvajecca paetapna — spačatku kryž, potym kałona, zatym tumba. U ziamli zastajecca tolki asnova. Imavierna, pomniki raźbirajuć i zdajuć na mietał.
Taksama staryja mahiły rujnujucca. Naprykład, viasnoj minułaha hoda na katalickich mohiłkach upała adno z najstarejšych nadmahillaŭ, pastaŭlenaje ŭ 1802 hodzie, ale staraśvieckuju kałonu padymać nie było kamu.
Zhodna z kartaj sanitarnaj adkaznaści Hrodna, za mahiły na mohiłkach nichto nie adkazvaje. Prapisanaja adkaznaść za terytoryi vakoł kaplicy i carkvy, i miescy ahulnaha karystańnia. Za sami mohiłki — nie.
Na starych mohiłkach u Hrodnie pavaliŭsia 222‑hadovy pomnik. I nie fakt, što buduć padymać
Milicyja znajšła vandałaŭ, jakija raźnieśli bietonnuju aharodžu mohiłak. Im pa dzieviać hadoŭ
Sieryjnaha mohiłkavaha złodzieja zatrymali ŭ Vilejcy
«Na Radaŭnicu nie płačuć, a ŭspaminajuć». Jak biełarusy stalisia ledźvie nie adzinymi nośbitami staradaŭniaj tradycyi
Ciapier čytajuć
Histaryčnyja +40,4°C u Pinsku — heta tolki razahreŭ. Biełaruś uvachodzić u novuju klimatyčnuju eru i na vačach stanie lesastepam14
Kamientary
Bo dzieści ŭ Viciebskaj vobłaści na ćvintaru traplaŭ na kavanyja z žaleza pomniki z datami pachavańnia 1770 i maładziej hady.