Jeŭrakamisija aštrafavała Ch za nieprazrystaść i ptušačku, «jakaja ŭvodzić u zman». Iłan Mask zaklikaŭ raspuścić ES
Jeŭrakamisija aštrafavała sacyjalnuju sietku X na 120 miljonaŭ jeŭra za parušeńnie Zakona ab ličbavych pasłuhach. Heta rašeńnie vyklikała mocnaje abureńnie jak va ŭładalnika sacsietki, multymiljardera Iłana Maska, tak i ŭ pradstaŭnikoŭ dziaržaŭnych uładaŭ ZŠA.
Pretenzii Jeŭrasajuza vyklikali:
- siniaja ptušačka, jakaja «ŭvodzić u zman»: jana padajecca jak paćviardžeńnie asoby ŭładalnika akaŭnta, ale nasamreč kampanija nie pravodzić nijakich pravierak, a ptušački prosta pradaje;
- nieprazrysty archiŭ rekłamy: X nie daje poŭnaha dostupu da infarmacyi pra rekłamnyja kampanii, uklučajučy ich źmieściva i zakazčykaŭ, što pavialičvaje ryzyku machlarstva i raspaŭsiudžańnia škodnaj infarmacyi;
- zabarona aŭtamatyzavanaha zboru publičnych danych: płatforma pieraškadžaje pracy starońnich «robataŭ», jakija źbirajuć danyja, patrebnyja daśledčykam dla vyvučeńnia hramadskaj dumki.
Rašeńnie Jeŭrakamisii vyklikała abureńnie mnohich amierykanskich palitykaŭ. Vice-prezident ZŠA Džej Dzi Vens zajaviŭ, što ES štrafuje X «za toje, što jon nie zajmajecca cenzuraj» i krytykavaŭ Jeŭropu za «ataku na amierykanskija kampanii praz łuchtu».
Dziaržaŭny sakratar ZŠA Marka Rubia nazvaŭ štraf «atakaj zamiežnych uradaŭ nie tolki na Ch, ale i na ŭsie amierykanskija płatformy i amierykanski narod».
Sam Iłan Mask zajaviŭ, što ES treba raspuścić i viarnuć suvierenitet asobnym krainam, kab urady lepš pradstaŭlali ludziej. Na heta polski ministr zamiežnych spraŭ Radasłaŭ Sikorski adkazaŭ miljarderu: «Idzi na Mars. Tam nie cenzurujuć nacysckaje pryvitańnie», namiaknuŭšy na žest Maska padčas inaŭhuracyi Donalda Trampa sioleta ŭ studzieni.
Ciapier čytajuć
Kab nie siadzieć u Rasii za narkotyki, małady danosčyk z Ašmianaŭ zapisaŭsia na front. Dyj zhinuŭ16
Kamientary