Stała viadoma imia biełaruskaha kadebista, jaki kuryravaŭ zavierbavanaha kiraŭnika małdaŭskaj raźviedki. I ich chitry sposab kamunikacyi

Były namieśnik kiraŭnika śpiecsłužby Małdovy, pavodle materyjałaŭ kryminalnaj spravy, padtrymlivaŭ apieratyŭnuju suviaź z supracoŭnikam KDB Biełarusi Uładzimiram Varažbitavym, piša rumynski sajt Digi24.ro.

Imia Varažbitava nie zhadvajecca ŭ adkrytych krynicach u Biełarusi. Paviedamlajuć, što biełaruskaha ahienta padtrymlivali jašče try supracoŭniki KDB, a raniej jon udzielničaŭ u kiravańni inšym špijonam Uładzisłavam Nadziejkam, jaki pracavaŭ na terytoryi Polščy.

Viadoma taksama pra abrany Bełanam mietad suviazi z supracoŭnikami biełaruskaha KDB: zamiest taho, kab adpraŭlać elektronnyja paviedamleńni, jakija možna pierachapić pry pieradačy, udzielniki sumiesna atrymlivali dostup da adnaho i taho ž akaŭnta elektronnaj pošty i pisali paviedamleńni ŭ tečcy «Čarnaviki», faktyčna nie adpraŭlajučy ich.

Sudovyja krynicy śćviardžajuć, što paviedamleńni zachoŭvalisia ŭ sumiesnym akaŭncie, byli bačnyja abodvum bakam, ale nie pieradavalisia praz elektronnuju poštu. Hety mietad, jaki hadami vykarystoŭvajuć špijonskija struktury va ŭsim śviecie, značna ŭskładniaje pracu śledčych. Paśla aryštu małdaŭskaha špijona elektronnaja pošta była vydalenaja ź Biełarusi.

Chto taki Alaksandru Bełan

Aleksandru Bełan, były namieśnik dyrektara Słužby infarmacyi i biaśpieki (SIS) Małdovy, zatrymany ŭ Rumynii za špijanaž na karyść Respubliki Biełaruś, znachodziŭsia pad śledstvam u Respublicy Małdova prynamsi pa dźviuch kryminalnych spravach.

47‑hadovy Bełan byŭ vielmi aktyŭny ŭ sacyjalnych sietkach paśla zvalnieńnia z SIS, krytykavaŭ dziejnaść małdaŭskich śpiecsłužbaŭ, naprykład, za niesvoječasovaje ŭmiašańnie i niepryniaćcie mier suprać rasijskaha ŭpłyvu na vybary ŭ Respublicy Małdova. Za apošnija dva hady jon pravioŭ jak minimum čatyry pres-kanfierencyi i byŭ zaprošany na niekalki televizijnych šou ŭ jakaści ekśpierta.

Na adnoj z pres-kanfierencyj jon zajaŭlaŭ, što ŭ 2019—2022 hadach SIS moh nie pieraškadžać ujezdu ŭ Małdovu vysokapastaŭlenych «emisaraŭ zamiežnaj raźviedki», jakija ŭdzielničali va ŭmacavańni vajenizavanych struktur u sieparatysckim Prydniastroŭi i kansultavali palitykaŭ u Tyraspali.

Paśla jaho aryštu 8 vieraśnia 2025 hoda ŭ aeraporcie rumynskaj Cymišaary rumynskaje Upraŭleńnie rasśledavańnia arhanizavanaj złačynnaści i teraryzmu (DIICOT) zajaviła, što padazraje Bełana ŭ asabistych kantaktach z zamiežnaj dziaržavaj — Respublikaj Biełaruś — i ŭ prodažy joj sakretnaj infarmacyi.

Bełan pracavaŭ u małdaŭskich siłavych strukturach bolš za 20 hadoŭ, a ŭ 2016—2018 hadach zajmaŭ pasadu namieśnika dyrektara SIS. Pavodle jaho ŭłasnych pakazańniaŭ, jon byŭ nie raz adznačany, uznaharodžany miedalom «Za bajavyja zasłuhi». U publičnych vystupach, nazyvajučysia pałkoŭnikam SIS, Bełan zajaŭlaŭ, što kaardynuje «asnoŭnyja apieratyŭnyja ŭzroŭni» małdaŭskich śpiecsłužbaŭ, u tym liku Antyterarystyčny centr, i kiruje składanymi śpiecapieracyjami, «niekatoryja ź jakich majuć histaryčnaje značeńnie».

• 1
• 0
• 5
• 4
• 5
• 0
• 2
• 0