Vandroŭnik i biznesoviec ź Minska za dva dni znajšoŭ sabie praz sacsietki niaviestu — najbolš spadabałasia dziaŭčyna z Rasii

Svaju historyju jon raskazvaŭ u sacsietkach.

A. pieratvaryŭ svaju luboŭ da vandrovak u pracu. Sam jon naviedaŭ 55 krain (tolki ŭ Isłandyi byŭ kala 20 razoŭ), ciapier zajmajecca arhanizacyjaj niebanalnych turaŭ dla inšych.

Da taho, jak sustreć budučuju žonku, A. byŭ u nie vielmi ŭdałych praciahłych adnosinach na dystancyi. Chłopiec, jaki šmat vandruje, pieravažna žyvie ŭ Biełarusi, a dziaŭčyna, ź jakoj jon tady sustrakaŭsia, asieła ŭ Niderłandach.

Dziaŭčyna była padpisanaja na instahram daśviedčanaha vandroŭnika — praz padobnyja cikavaści i pačali pierapisvacca. Ale ž pačać žyć razam u ich tak i nie vyjšła. Pierasiakalisia zakachanyja tolki padčas vandrovak.

Niekalki razoŭ sychodzilisia i razychodzilisia. Kančatkova vyrašyć los adnosin para sabrałasia davoli cikavym čynam. Letaś jany razam prajšli 790 kiłamietraŭ pa pałomnickim maršrucie da saboru ŭ Sanćjaha-de-Kampasteła ŭ Ispanii. 

I A., i jaho abrańnica raniej paasobku prachodzili adzin z maršrutaŭ, tamu dobra viedali, jak treba rychtavacca da piešaj vandroŭki ciaham miesiaca. Ale pry kancy składanaha šlachu zrazumieli, što ŭsio ž nie bačać budučyni razam, i kančatkova raźvitalisia. 

Małady mužčyna praź niekalki miesiacaŭ (heta było ŭ 2025-m) pačaŭ šukać žonku praz sacyjalnyja sietki — instahram, fejsbuk i Threads. Pisaŭ, što nie choča błukać pa cindary i ładzić marafon spatkańniaŭ. 

Pra siabie paviedamiŭ: paśpieŭ pažyć u Jeŭropie, papracavać u Kitai i Rasii, mahistr psichałohii, pa pieršaj adukacyi — ekanamist. Dadaŭ, što całkam samastojny ŭ pobytavych pytańniach, lubić jachtynh, ranišnija prabiežki, sabak i ludziej z sensam — z kim jość, ab čym pahavaryć i pamaŭčać.

Raskryŭ i pytańnie finansaŭ: žyvie za horadam, robić ramont u jeŭra-dvuchpakajoŭcy ŭ «Minsk Śviecie» (kredyt na 15 hadoŭ), jeździć na «elektryčcy» BMW. Zarablaje ŭ siarednim dźvie tysiačy jeŭra štomiesiac.

Da niaviesty patrabavańniaŭ było nie vielmi šmat. A. napisaŭ, što šukaje «nie pryncesu i nie ŭtrymanku». «Cełasnuju, enierhičnuju, dapytlivuju, viasiołuju i spartyŭnuju dziaŭčynu ad 21 da 29 hadoŭ. Ruskamoŭnuju — u pryjarytecie ź Biełarusi, Rasii abo Ukrainy. Bieź dziaciej, nie zamužam, z žadańniem stvaryć siamju ŭ budučyni. Z vyšejšaj adukacyjaj, asabistym dachodam i, pažadana, viedańniem anhlijskaj movy». 

Paśla ŭ kamientarach tłumačyŭ, što samaje hałoŭnaje — supolny mientalny bekraŭnd i kab rodnaja mova abrańnicy była ruskaja.

U chutkim časie A. daŭ spravazdaču: za dva dni jaho dopis u roznych sacsietkach ahułam pabačyła bolš za dźvieście tysiač čałaviek, jon atrymaŭ paviedamleńni bolš čym ad 150 dziaŭčat z roznych krain śvietu — ad Partuhalii da Karei.

Siarod tych, chto adhuknuŭsia, była i rasijanka I., jakaja žyła ŭ Maskvie, ale jakraz u toj momant znachodziłasia ŭ Minsku.

U chutkim časie maładyja ludzi sustrelisia, a praź niekalki spatkańniaŭ dziaŭčyna sabrała ŭ Maskvie rečy i razam z sabakam pierajechała da kachanaha ŭ Biełaruś.

Pra siabie ŭ instahramie I. raspaviadaje, što vučycca psichałohii, dzielicca receptami jak šef-kandytarka (jana ciapier robić torty ŭ Minsku) i sprabuje stvaryć «cindar dla sabačnikaŭ» — kab ludzi mahli znachodzić kampaniju dla prahułak z sabakami. 

Jana taksama lubić vandravać — u 2024 hodzie, naprykład, publikavała fotazdymki z akupavanaha Kryma. 

I. paviedamiła, što sioleta A. zrabiŭ joj prapanovu ruki i serca — i jana pahadziłasia. U sakaviku para jeździła ŭ Rasiju da siamji dziaŭčyny svatacca.

Dziaŭčyna piša, što dajechali jany z pryhodami, pra jakija jašče ŭnukam raspaviadać buduć. Ale ž kachany na pytańnie, ci dobry heta znak, adkazaŭ: «Budzie viesieła!».

• 3
• 7
• 6
• 44
• 2
• 0
• 3
• 0