«My nie ŭličyli heta, prabačcie». RFI vydaliła rasśledavańnie ab likvidacyi hienierała HRU
Francuzskaja radyjostancyja RFI aficyjna pryznała pamyłku i vydaliła svoj rezanansny materyjał, u jakim śćviardžałasia, što hienierał HRU Andrej Aviarjanaŭ zahinuŭ u vyniku ataki ŭkrainskaha bieśpiłotnika.
Pačatkovaja viersija rasśledavańnia RFI hruntavałasia na źviestkach ad «dobra infarmavanych» livijskich krynic. Śćviardžałasia, što ŭkrainskija vajskoŭcy, jakija nibyta bazujucca ŭ Livii, 19 śniežnia 2025 hoda atakavali tankier QENDIL, na borcie jakoha znachodziŭsia Aviarjanaŭ — hienierał HRU, jaki kuryravaŭ dyviersii i zabojstvy za miažoj.
Adnak paźniej žurnalisty pryznali, što nie pryniali pad uvahu dokazy prysutnaści hienierała na Madahaskary ŭ lutym 2026 hoda.
Asablivuju rolu ŭ vykryćci pamyłki adyhraŭ viadomy žurnalist-rasśledavalnik Chrysta Hrozieŭ. Jon nazvaŭ materyjał RFI «całkam falšyvaj historyjaj» i pakazaŭ na sumnieŭnaść pieršakrynic infarmacyi.
«Adzinaj krynicaj hetych iłžyvych čutak [pra śmierć Aviarjanava] źjaŭlajecca dyskredytavany akaŭnt u Telegram, jaki apublikavaŭ ich amal try miesiacy tamu», — zajaviŭ Hrozieŭ.
Redakcyja RFI paćvierdziła, što dokazy vizitu Aviarjanava na Madahaskar robiać viersiju ab jahonaj hibieli niemahčymaj.
«Adpaviedna, źmiest hetaha artykuła byŭ vydaleny. My prynosim prabačeńni našym čytačam za hetyja pamyłki», — havorycca ŭ zajavie miedyja.
Taksama ŭ vydalenym materyjale zajaŭlałasia ab prysutnaści 200 ukrainskich vajskoŭcaŭ u Livii, jakija nibyta pravodziać apieracyi suprać rasijskaha cieniavoha fłotu.
Ciapier čytajuć
Dziaržkanały poŭniacca abvinavačvańniami na adras Ukrainy. Nivodzin dziaržkanał nie apublikavaŭ kamientary ŭkraincaŭ. Reakcyi Łukašenki dahetul niama2828
Dziaržkanały poŭniacca abvinavačvańniami na adras Ukrainy. Nivodzin dziaržkanał nie apublikavaŭ kamientary ŭkraincaŭ. Reakcyi Łukašenki dahetul niama28
Cichanoŭskaja pra ŭdar pa aŭtobusie ź biełaruskimi dziećmi: Nie ryzykujcie žyćciom — nie jedźcie ŭ Rasiju, jakaja viadzie złačynnuju i niespraviadlivuju vajnu2727
Kamientary