«Lepš by ja hetaha nie bačyła!» U Threads aburylisia vielikodnaj instalacyjaj u Dana Mall. Ale nie ŭsie
U Threads razharełasia haračaja dyskusija vakoł vielikodnaj instalacyi ŭ staličnym HC Dana Mall. Tam pastavili «kuryny kub» — nievialikuju vitrynu z žyvymi kurami dla zabavy naviedvalnikaŭ. Karystalniki ŭ svajoj reakcyi padzialilisia na dva łahiery: adny patrabujuć spynić ekspłuatacyju ptušak, inšyja ličać, što heta drobiaź u paraŭnańni z budniami charčovaj industryi.
«Biełarusy, u Dana Mall ździekujucca z žyvioł! My pavinny štości zrabić! U adnoj z kram pastavili tak zvany kuryny kub, dzie dźvie kurački tulacca ŭ skryni, mienšaj za mietr na mietr, kab ludzi hladzieli i viesialilisia, pakul žyvioły pakutujuć! «Mierzkij Kokobaj» vykłaŭ nie mienš mierzki post u svoj kanał, dzie žartuje z hetaj sumnaj situacyi. Takoha nie pavinna być! U XXI stahodździ nie pavinny isnavać zaaparki, delfinaryi, nie pavinna isnavać ekspłuatacyja žyvioł!» — napisaŭ karystalnik muawgrechka.
Šmat chto ŭ kamientaryjach padtrymaŭ aŭtara, što trymać žyvych istot u ciesnaj skryni dziela markietynhu — heta dzikunstva.
«U mianie serca kryvioju ablivajecca… Nie razumieju, jak ludziam moža być nastolki ŭsio roŭna na žyvych istot. Mnohija napisali, što kury — heta nie žyvioły, a ježa. Chočacca vieryć, što adekvatnych ludziej značna bolš».
«Ździekavacca z žyvioł nielha. Cyrki, delfinaryi i inšyja žyvadziorni zakryć, kab i duchu nie było. Usio dziela hrošaj!»
«Lepš by ja hetaha nie bačyła!»
«Vialiki dziakuj za ahałosku hetaha varjactva! Pryjemna bačyć, jak šmat ludziej ubačyła biesčałaviečnaść u takoj «dekaracyi». Niachaj z kuračkami ŭsio budzie dobra. Ale karystajusia mahčymaściu, kab nahadać usim: jašče bolš biaźlitasnymi źjaŭlajucca fiermy jajek. Čaściej za ŭsio tam kurej utrymlivajuć u kletačnych sistemach (bo jany samyja vyhadnyja). Pra žachi možacie pačytać sami, ja prosta pakažu davoli dobraje fota (bo najčaściej jany tam łysyja i ŭsio navokał u haŭnie)».
Inšaja častka kamientataraŭ adznačyła, što ŭdzieł u instalacyi — daloka nie najhoršy los dla sielskahaspadarčaj ptuški, i abvinavaciła aŭtaraŭ dopisu ŭ praźmiernaj emacyjnaści.
«Ščyra kažučy, ja tut ničoha kryminalnaha nie baču. Kury ščaślivyja, klujuć ziarniatki, jašče i za škłom stolki padziej. Mnie zdajecca, heta daloka nie horšaja dola».
«Heta prosta biazmozhłyja kury, jakich na ptuškafabrycy prosta adbrakavali b u kambikorm. A tut jany žyćciu radujucca».
«Z-za vas kuračka ciapier adpravicca ŭ abvałačny cech».
«Ciapier kurački pojduć u sup».
Paźniej aŭtar pasta napisaŭ, što atrymaŭ adkaz ad Dana Mall, u jakim havaryłasia:
«Dziakujem za vašu pilnaść i nieabyjakavaść da situacyi. Raźmiaščeńnie žyvioł nie było ŭzhodniena z administracyjaj HC, my nie byli pra heta papiaredžanyja. My vystupajem za humannaje i adkaznaje staŭleńnie da žyvioł i ŭžo raźbirajemsia ŭ tym, što adbyłosia, kab pryniać adpaviednyja miery!»
Pra dalejšy los kurej nie paviedamlajecca.
Kamientary
a čamu miarzotny, kali jon suprać hetaha?