Siłaviki pałochajuć, što atrymali dostup da ŭnutranaj bazy miedyja «Most». A što nasamreč?

Telehram-kanał, źviazany ź biełaruskimi siłavikami, apublikavaŭ tablicu ź piersanalnymi źviestkami ludziej, jakija, jak śćviardžajecca, u rozny čas byli źviazanyja ź miedyja «Most» — jak supracoŭniki ci jak hieroi publikacyj. Siłaviki pałochajuć ludziej z tablicy mahčymym kryminalnym pieraśledam «za sadziejničańnie ekstremisckaj dziejnaści».

U apublikavanych skrynšotach vidać, što ŭ tablicu ŭniesienyja imiony, fota, bijahrafičnyja źviestki i spasyłki na sacsietki ludziej. Častka fotazdymkaŭ uziataja z adkrytych fejsbuku-profilaŭ. Analiz śpisu pakazvaje, što ŭ jaho trapili jak byłyja supracoŭniki «Mosta» i hieroi jaho publikacyj, tak i ludzi, jakija nie majuć suviazi z hetym miedyja.

Usie ludzi sa śpisu znachodziacca pa-za miežami Biełarusi.

Siarod ich, naprykład, Ihar Pałynski, jaki publična adreahavaŭ na dopis i napisaŭ, što byŭ suzasnavalnikam «Mosta» i hałoŭnym redaktaram u 2021—2022 hadach, ale z kanca 2022 hoda nie maje da miedyja nijakaha dačynieńnia. 

U tablicy taksama fihuruje Ivan Straškievič — były biełaruski pamiežnik, jaki paśla 2020 hoda žyŭ u Polščy i Litvie. «Most» niekalki razoŭ pisaŭ pra jaho historyju: u 2023 hodzie Straškievič apynuŭsia ŭ mihracyjnaj turmie ŭ Litvie, bo litoŭskija ŭłady paličyli jaho pahrozaj nacyjanalnaj biaśpiecy praz byłuju słužbu na biełaruskaj miažy. Paźniej jaho pieradali Polščy.

Jašče adzin čałaviek sa śpisu — Maksim Sienik, były rabotnik «Hrodna Azota» i były palitviazień. U 2023 hodzie jaho asudzili pa abvinavačańniach u «abrazie Łukašenki» i «sadziejničańni ekstremisckaj dziejnaści». Na volu jon vyjšaŭ 13 śniežnia 2025 hoda ŭ składzie hrupy ź inšymi palitviaźniami.

Častka ludziej sa śpisu — publičnyja asoby ź biełaruskaj dyjaspary. Naprykład, mastačka Taćciana Savič. Jaje pracy vystaŭlalisia ŭ tym liku za miažoj, a paśla emihracyi jana ŭdzielničała ŭ biełaruskich kulturnych imprezach u Biełastoku. 

Heta dazvalaje mierkavać, što havorka idzie pra ludziej, jakija tak ci inakš uzhadvalisia ŭ miedyja. A infarmacyja pra ich sabranaja z adkrytych krynic, publikacyj miedyja i sacsietak.

Sam «Most» — miedyja ŭ Biełastoku, jakoje piša pra biełarusaŭ u Polščy, emihracyju, lehalizacyju, palityčny pieraśled i žyćcio dyjaspary. U Biełarusi sajt «Mosta» i źviazanyja ź im sacsietki ŭ 2023 hodzie pryznali «ekstremisckim farmavańniem». 

U redakcyi «Mosta» śćviardžajuć, što nijakich uciečak nie było. Žurnalisty nazyvajuć apublikavanuju infarmacyju pravakacyjaj i padkreślivajuć, što nie paćviardžajuć sapraŭdnaść «bazy», na jakuju spasyłajucca siłaviki.

• 0
• 0
• 1
• 6
• 1
• 0
• 2
• 0