Prychilniki tradycyjnaha kavałkavaha myła nastojvajuć na asablivym adčuvańni čyścini, jakoje jano daje, u toj čas jak amatary hielaŭ ličać vykarystańnie ćviordaha myła niehihijeničnym. Voś mierkavańnie mikrabijołaha.
Doktar miedycyny Prymroŭz Frystan (Primrose Freestone), kliničny mikrabijołah ź Lesterskaha ŭniviersiteta, patłumačyŭ vydańniu Daily Mailpa, što abiedźvie formy myła ŭ cełym adnolkava dobra zmyvajuć bakteryi, hrybki i virusy sa skury. Ale pamiž imi jość važnaje adroźnieńnie: ćviordaje myła sapraŭdy moža nazapašvać mikraarhanizmy.
Heta źviazana z tym, što brusok padčas vykarystańnia niepasredna kantaktuje sa skuraj, źbirajučy na svajoj pavierchni mikroby. Vadkaje ž myła znachodzicca ŭ zakrytym kantejniery, što vyklučaje pramy kantakt asnoŭnaj masy praduktu z navakolnym asiarodździem i skuraj roznych ludziej.
Daśledavańni pakazali, što myła, jakim karystajucca časta, moža pieratvaracca ŭ svojeasablivy «reziervuar» dla bakteryj i hrybkoŭ. Mienavita tamu ŭ balnicach i miedycynskich ustanovach zvyčajna addajuć pieravahu vadkim srodkam.
Tym nie mienš, navat kali vy addajecie pieravahu kavałkavamu myłu, ryzyka pieradačy chvarob, jak adznačajuć navukoŭcy, zusim małaja. Myła samo pa sabie stvorana tak, kab razburać tłušč i zabrudžvańni. Jaho malekuły źbirajucca ŭ miceły — svojeasablivyja šaryki, jakija zachoplivajuć brud, mikraarhanizmy i tłušč, paśla čaho ŭsio heta prosta zmyvajecca vadoj.
Kali čałaviek staranna myje i paśla vyciraje ruki ci cieła, bolšaść mikraarhanizmaŭ, što trapili z pavierchni myła, vydalajucca miechanična. Daśledavańni, na jakija spasyłajecca ekśpiert, pakazvajuć, što pry pravilnym myćci zaražeńnie praź ćviordaje myła małaimaviernaje.
Jak adznačaje doktar Frystan, značna bolšaj krynicaj ryzyki źjaŭlajucca dapamožnyja srodki dla myćcia — hubki i mačałki. Kletki skury, jakija zastajucca ŭ ich porach, stanoviacca idealnym asiarodździem dla razmnažeńnia bakteryj. Bolš za toje, žorstkija mačałki mohuć nanosić mikraskapičnyja paškodžańni skury, praź jakija infiekcyja lahčej traplaje ŭ arhanizm.
Kali vy nie hatovyja admovicca ad mačałki ci hubki, to dla minimizacyi ryzyk jaje varta raz na tydzień zamočvać u 10‑pracentnym rastvory adbielvalnika, paśla čaho staranna prapałaskvać i vysušvać.
Heta dapamoža źniščyć bolšaść bakteryj dy hrybkoŭ i harantuje, što vy vypadkova nie zrobicie siabie bolš brudnymi ŭ sprobie stać čyściejšymi.
Ciapier čytajuć
Staršynia Rady biaśpieki zaklikaŭ biełarusaŭ ustrymacca ad pajezdak u Rasiju3
Kamientary