Z-za rostu cenaŭ na bienzin prodažy elektramabilaŭ u Jeŭropie vyraśli na tracinu
Pavodle statystyki, jakaja achoplivaje 16 rynkaŭ Jeŭrapiejskaha sajuza, na jakija prypadaje bolš za 80% prodažaŭ aŭtamabilaŭ, rehistracyja elektrakaraŭ pavialičyłasia na 34%. Ale, jak piša Reuters, pakul niezrazumieła, nakolki doŭhaterminovym budzie hety trend. Bo prodažy elektramabilaŭ rastuć najpierš z-za vysokich cen na bienzin i pierabojaŭ ź jaho pastaŭkami.
Popyt na elektrakary źviazany z tym, što ceny na naftu ŭ śviecie vyraśli ŭdvaja. A jaje zapasy ŭ krainach Jeŭropy i Azii, pavodle danych Mižnarodnaha enierhietyčnaha ahienctva, nie pieravyšajuć dvuchtydniovaha ŭzroŭniu. Hramadzianie ES chočuć zaścierahčy siabie ad mahčymaha «biazkonnaha» statusu i lišnich vydatkaŭ.
Pry hetym statystyka pakazvaje, što kolkaść elektramabilaŭ raście nie tolki ŭ Danii i Niderłandach, dzie jany i tak daŭno papularnyja, ale i na takich rynkach, jak Italija, dzie elektratranspart da hetaha času raźvivaŭsia značna pavolniej.
Asabliva rezki rost prodažaŭ elektramabilaŭ jeŭrapiejskija dylery pačali adznačać z krasavika, kali stała zrazumieła, što kanflikt u Piersidskim zalivie zaciahniecca. Naprykład, u brytanskaj kampanii Octopus Electric Vehicles paviedamili Reuters, što popyt na novyja elektramabili vyras na 95%, a na patrymanyja elektrakary — uvohule na 160%.
Kamientary