U Japonii zhareła budyjskaja śviatynia, u jakoj užo 1200 hadoŭ haryć «viečny ahoń»
U Japonii znoŭ zhareła budyjskaja śviatynia, dzie, jak śćviardžajuć vierniki, užo kala 1200 hadoŭ bieśpierapynna haryć tak zvany «viečny ahoń». Heta miesca maje vialikaje relihijnaje značeńnie dla budystaŭ, piša The New York Times.
Pažar adbyŭsia 20 maja ŭ zale Rejkoda, jakaja znachodzicca na vostravie Mijadzimi kala hary Misen. Ahoń achapiŭ draŭlanuju budyninu, u tym liku malitoŭnyja pamiaškańni. Pažarniki daviedalisia pra ŭzharańnie ranicaj, i prykładna praź dźvie hadziny ahoń udałosia patušyć. Nichto nie paciarpieŭ.
Niahledziačy na razbureńnie budynka, sam «viečny ahoń» udałosia vyratavać — jaho vynieśli padčas likvidacyi pažaru. U chramie Dajsio-in, jakomu naležyć heta śviatynia, paviedamili, što adrazu pačnuć adnaŭleńnie zały.
Pavodle padańnia, hety ahoń byŭ zapaleny jašče ŭ IX stahodździ manacham Kukajem, zasnavalnikam adnoj z budyjskich škoł. Nad hetym połymiem hrejuć vadu, jakuju ličać hajučaj i takoj, što prynosić udaču pałomnikam.
Heta ŭžo nie pieršy vypadak pažaru ŭ hetym miescy. Raniej budynak užo hareŭ, paśla čaho jaho adnavili ŭ 2005 hodzie. Śviatynia zroblenaja z tradycyjnych materyjałaŭ, tamu jana asabliva ŭraźlivaja da ahniu.
Pryčyny ciapierašniaha pažaru pakul vyśviatlajucca miascovymi ŭładami.
Kamientary