Biełaruskija ŭpyrchliki vyjhrali sud suprać francuzskich uładaŭ

Francyja nie davała palityčnaha prytułku. Ale adkul hetyja ludzi?

Biełaruskaja siamja, jakoj pahražaje departacyja z Francyi, vyjhrała ŭ Strasburhu isk suprać francuzskich uładaŭ.

Jak paviedamiła 2 vieraśnia pres-słužba Jeŭrapiejskaha suda pa pravach čałavieka ŭ Strasburhu, sudździ pieraścierahli Francyju ad departacyi biełaruskaj siamji, apasajučysia drennaha abychodžańnia ź joj na radzimie. U paviedamleńni adznačajecca, što biełarusy (nazvany tolki inicyjały Y.P. i L.P.) 1966 i 1967 hoda naradžeńnia z dvuma dziećmi ŭ lutym 2005 hoda byli vymušany emihryravać z Mahilova ŭ Strasburh, dzie paprasili palityčnaha prytułku.

Paviedamlajecca, što Y.P., člen Partyi BNF, u rozny čas, pačynajučy z 1999 hoda, a paźniej i jaho syn zatrymlivalisia i źbivalisia supracoŭnikami pravaparadku za ŭdzieł u demanstracyjach i inšuju apazicyjnuju dziejnaść.

U 2002 hodzie, pavodle słoŭ istca, jaho źbili paśla taho, jak jon uznačaliŭ mahiloŭskuju arhanizacyju Partyi BNF. Z 2002 hoda Y.P. biespaśpiachova prasiŭ palityčnaha prytułku ŭ Hiermanii i Narviehii.

U 2005 hodzie siamja pryjechała ŭ Strasburh i paprasiła palityčnaha prytułku. Francuzskija ŭłady abhruntavali admovu niedastatkovaściu dokazaŭ, što siamja źviedvała pieraśled pa palityčnych matyvach.

Zatym Y.P. i L.P., jakija nielehalna žyli ŭ Francyi i naradzili treciaje dzicia, źviarnulisia z prośbaj dać palityčny prytułak da ŭradaŭ Danii, Narviehii i Šviecyi, adnak im było admoŭlena i ich vysłali ŭ Francyju.

U červieni 2008 hoda biełaruskija hramadzianie padali prašeńnie ŭ Strasburhski sud, kab apratestavać rašeńnie ab departacyi, pakolki na radzimie im byccam by pahražaje niebiaśpieka. Sud zadavoliŭ isk.

U paviedamleńni ŭkazana, što iściec vioŭ «aktyŭnuju apazicyjnuju dziejnaść», a zapyt na pradastaŭleńnie palityčnaha prytułku moža rasceńvacca ŭ Biełarusi jak «dyskredytacyja», za što praduhledžana turemnaje źniavoleńnie.

«U ciapierašnich umovach adpraŭka istcoŭ u Biełaruś stała b parušeńniem artykuła 3 (zabarona katavańniaŭ i abychodžańnia, jakoje źjaŭlajecca biesčałaviečnym i źnievažaje hodnaść)», — havorycca ŭ dakumiencie.

Tym časam pakul nie atrymałasia ŭdakładnić asobu mahiloŭskaha aktyvista Partyi BNF.

Namieśnik staršyni partyi Ryhor Kostusieŭ paviedamiŭ, što ŭ 2002 hodzie jon byŭ abrany kiraŭnikom mahiloŭskaj arhanizacyi partyi. Jon taksama nie zmoh skazać, chto moža stajać za inicyjałami Y. P. Rašeńnie Jeŭrapiejskaha suda pa pravach čałavieka nabudzie moc, kali baki na praciahu troch miesiacaŭ nie źviernucca z prośbaj pieradać spravu ŭ Vialikuju pałatu suda, jakaja, u svaju čarhu, moža adchilić zvarot.

• 0
• 0
• 0
• 0
• 0
• 0
• 0
• 0