«Strach, strach i jašče raz strach. Adnak heta nie padziejničaje»

Na Uschodnich mohiłkach chavajuć Aleha Biabienina. Litvina: «Praŭdu [pra śmierć Biabienina] daviedajemsia tolki paśla źmieny ŭłady».

15.10

Hramadzianskaja panichida skončyłasia. Trunu pavieźli na Uschodnija mohiłki Minska.

14.50

Hramadzianskuju panichidu naviedali pradstaŭniki ruchu «Za Svabodu» — Alaksandr Milinkievič, Juraś Hubarevič, Ina Kulej, Aleś Łahviniec. U razmovie z karespandentam «NN» A.Milinkievič adznačyŭ, što byŭ asabista znajomy z Aleham Biabieninym. «Ja dobra jaho viedaŭ, Aleh vałodaŭ vydatnym pačućciem humaru, davaŭ usim enierhiju, dzialiŭsia joj ź inšymi ludźmi. Ja nie chaču kamientavać taho, što zdaryłasia, pakul niama aficyjnych vynikaŭ. Adnak adznaču, što varta zadumacca, kamu była vyhadnaj śmierć Aleha Biabienina», — zazanačyŭ Alaksandr Milinkievič.

Blizki paplečnik Aleha Biabienina, Mikałaj Chalezin, nahadaŭ pra isnavańnie niestykovak ŭ spravie hibieli žurnalista. «Isnujuć niestykoŭki ŭ spravie hibieli Aleha. Ich šmat. Šmat pytańniaŭ, na jakija ŭłady nie dajuć adkazu. Čamu ekśpiertyza zaciahniecca na ceły miesiac, kali śledstva amal adrazu zajaviła, što heta było samahubstva? Čamu ŭ pratakołach niama ni słova pra admieciny na ciele Aleha, jakija my bačyli?

Čamu jon vybraŭsia na lecišča adzin, čaho nikoli raniej u žyćci nie rabiŭ? Čamu ŭ domie była idealnaja čyścinia, prosta sterylnaja?

Kiraŭnica Biełaruskaj asacyjacyi žurnalistaŭ Žanna Litvina taksama adznačaje mnostva niestykovak u spravie hibieli Aleha Biabienina i nie vieryć u aficyjnuju viersiju: «Sprava Biabienina — heta praciah łancužka z zabojstvami Źmitra Zavadskaha i Vieraniki Čarkasavaj. Anałohija hetych spraŭ z trahiedyjia, što zdaryłasia z Aleham u tym, što my dahetul nie majem adkazaŭ na pytańni. Pytańni, chto heta zrabiŭ. Mahčyma, praŭdu pra ŭsie hetyja trahiedyi my daviedajemsia tolki paśla źmieny ŭłady ŭ krainie.

Meta tych, chto heta zrabiŭ — zapałochać niezaležnych žurnalistaŭ. Strach, strach i jašče raz strach. Adnak heta nie padziejničaje. Takija dziejańni tolki nastrojvajuć na baraćbu. My budziem vykonvać svaje prafiesijnyja abaviazki, jak vykonvali ich dahetul».

14.30

Raźvitacca z Aleham Biabieninym pryjšło niekalki socien čałaviek. Siarod ich muzyka Alaksandr Kullinkovič, błohier Jaŭhien Lipkovič, maładyja palityki Artur Finkievič i Franak Viačorka, pradprymalniki Aleś Makajeŭ i Viktar Kalej.

Śviatłana Kalinkina ŭ intervju rasijskim žurnalistam paŭtaryła svaju viersiju ab źjaŭleńni ŭ atačeńni Łukašenki treciaj siły, jakaja žadaje destabilizavać situacyju ŭ krainie. «Žurnalist dla hetaha byŭ abrany nievypadkova. Łukašenka nikoli nie chavaŭ, što niezaležnyja žurnalisty — jaho najbolšyja vorahi», — adznačyła šef-redaktarka «Narodnaj voli».

14.20

Na hramadzianskaj panichidzie taksama prysutničajuć Alaksiej Maračkin, Aleś Šaternik, Źmicier Padbiarezski, Iryna Chalip, Mikałaj Chalezin, Aleś Bialacki, redaktary niezaležnych vydańniaŭ.

Zdymačnaja hrupa rasiejskaha telekanała RTR rychtuje repartaž z hramadzianskaj panichidy, apytvaje biełaruskich žurnalistaŭ i hramadskich dziejačaŭ. U rukach u rasijskich žurnalistaŭ kvietki.

Kolkaść ludziej, što pryjšli raźvitacca z Aleham Biabieninym, raście.

14.10

Ad pačatku na panichidzie prysutničaje bolš za sto čałaviek — u asnoŭnym kalehi i siabry Aleha Biabienina. Na panichidzie taksama prysutničajuć palityki Stanisłaŭ Šuškievič, Andrej Sańnikaŭ, Uładzimir Niaklajeŭ, Pavieł Sieviaryniec, Viktar Ivaškievič, Lavon Barščeŭski i inš.

Naviedali raźvitańnie z kiraŭnikom sajta charter97.org i rasijskija žurnalisty — u pryvatnaści zdymačnyja hrupy kanałaŭ NTV, ORT i RTR.

Za hramadzianskaj panichidaj nazirajuć supracoŭniki Centralnaha RUUS stalicy i nieviadomyja ŭ cyvilnym.

* * *

Nahadajem, što cieła Aleha Biabienina było znojdziena paviešanym 3 vieraśnia na jaho dačy pad Mienskam. Pravaachoŭnyja orhany paśpiašalisia paviedamić, što heta samahubstva. Adnak kalehi žurnalista paviedamlajuć, što śmierć Aleha Biabienina vyklikaje šmat pytańniaŭ. Sudmiedekśpierty błytajucca navat u dacie nastupleńnia śmierci žurnalista. Cieła žurnalista navat nie visieła, a ŭpirałasia kaleniami ŭ padłohu, kažuć siabry niabožčyka, jakija naviedali chatu razam ź milicyjaj.

Aleh Biabienin nie pakinuŭ paśla siabie nijakaj zapiski. Jon byŭ poŭny płanaŭ. U žurnalista zastalisia žonka i dvoje synoŭ. Jon byŭ adnym ź lideraŭ kamandy apazicyjnaha kandydata ŭ prezidenty Andreja Sańnikava.

Hramadzianskaja panichida pa zasnavalniku i kiraŭniku sajta charter97.org prajšła siońnia z 14 da 15 hadzin u Minsku ŭ zale rytualnych pasłuh pa adrasie: vulica Alšeŭskaha, 12. Pachavańnie adbudziecca na Uschodnich mohiłkach.

• 0
• 0
• 0
• 0
• 0
• 0
• 0
• 0