U ZŠA prajšła 29-ja Sustreča biełarusaŭ Paŭnočnaj Amieryki

Biełaruska-Amierykanski hramadski centr u Saŭt-Ryviery, štat Ńju-Džersi (SŠA), haścinna pryniaŭ udzielnikaŭ 29-j Sustrečy biełarusaŭ Paŭnočnaj Amieryki, jakaja doŭžyłasia dva dni — 4 i 5 vieraśnia.

Hetaja tradycyjnaja sustreča ładzicca raz na dva hady ŭ ZŠA albo Kanadzie. U hetym hodzie jaje arhanizatarami źjaŭlalisia Biełaruska-Amierykanskaje Zadzinočańnie (BAZA) i Biełaruska-Amierykanski hramadski centr u Saŭt Ryviery. U skład arhkamiteta, jaki dapamahaŭ u arhanizacyi sustrečy, uvachodzili kiraŭniki Centra: Jury Arcišenka, Jury Navumčyk. Taksama siabry Hałoŭnaj Upravy BAZA: Viačka Stankievič, Ała Orsa-Romana, Valery Dvornik, i ad adździełu BAZA ŭ Ńju-Džersi namieśnik staršyni — Vital Alisijonak i Ała Kuźmickaja.

Biełarusy sabralisia razam dziela kansalidacyi svajoj hramady, abmierkavańnia nadzionnych prablemaŭ žyćcia biełaruskaj emihracyi. Hetyja Sustrečy pravodziacca ź vieraśnia 1952 hoda. Sioletniaje mierapryjemstva abjadnała kala sta piacidziesiaci biełarusaŭ. Na farmalnaj častcy prysutničała amal dźvieście čałaviek! U Saŭt-Ryvier źjechalisia biełarusy z roznych štataŭ ZŠA: Kalifornii, Mičyhana, Ahajo, Piensilvanii, Dełaviera, Miniesoty, Ńju-Džersi, Ńju-Jorka, Vašynhtona — stalicy ZŠA, a taksama z kanadskich pravincyj Kviebiek (Atava), Antaryo (Taronta), Brytanskaja Kałumbija (Vankuvier).

U pamiaškańni hramadskaha centra byli razhornuty histaryčna-infarmacyjnyja stendy, pryśviečanyja 100-hodździu z dnia naradžeńnia paetki Łarysy Hienijuš i 100-hodździu vydańnia Vacłavam Łastoŭskim «Karotkaj historyi Biełarusi».

Na druhi dzień, 5 vieraśnia, balšynia haściej naviedali nabaženstvy ŭ biełaruskaj carkvie imia Śviatoj Jeŭfrasińni Połackaj, jakaja znachodzicca na terytoryi Biełaruska-Amierykanskaha hramadskaha centra ŭ Saŭt Ryviery, słužbu ŭ jakoj pravodziŭ miascovy śviatar ajciec Michaił. Taksama hości naviedali nabaženstvy ŭ carkvie, što znachodzicca ŭ Hajlend Parku, tam słužbu pravodziŭ Uładyka Śviatasłaŭ, japiskap Navahradski i Paŭnočna-Amierykanski.

Apoŭdni adbyłosia aficyjnaje adkryćcio Sustrečy. Paśla ŭstupnaha słova staršyni Hałoŭnaj upravy Biełaruska-Amierykanskaha Zadzinočańnia sp. Viački Stankieviča byli zasłuchanyja pryvitańni, adrasavanyja ŭdzielnikam 29-j Sustrečy biełarusaŭ Paŭnočnaj Amieryki.

Pieršym mieŭ słova Staršynia Hramadskaha Centra Bobi Cupryk, jaki pračytaŭ pryvitańni ad dvuch kanhresmienaŭ štata Ńju-Džersi: Frenka Pałone i Raša Chołta, a taksama ad sienatara štata Ńju-Džersi — Frenka Łoŭtenbierha.

Spadar Viačka Stankievič začytaŭ vitalnaje słova ad hubiernatara Ńju-Džersi — Krysa Kryści, a taksama ad staršyni Zhurtavańnia Biełarusaŭ Vialikabrytanii Aleny Michaluk i sakratara ZBV Siarhieja Piatkieviča, dzie havaryłasia: «Spadziajomsia, što Sustreča paspryjaje zachavańniu i raźvićciu hetaj šaścidziesiacihadovaj tradycyi, jakaja źjaŭlajecca vielmi karysnaj u spravie jadnańnia biełarusaŭ Paŭnočnaj Amieryki».

Alena Skurko začytała list, źviernuty da ŭdzielnikaŭ Sustrečy, ad staršyni Abjadnańnia na karyść dziaciej i moładzi, jakija vyvučajuć biełaruskuju movu, i Abjadnańnia baćkoŭ ź Biełastoččyny — Barbary Piakarskaj: «Aktyŭnaść biełaruskaj dyjaspary ŭ Amierycy važnaja nie tolki dla vas samich. Infarmacyja pra jaje razychodzicca šyroka pa śviecie… Usiudy, dzie b biełarusy ni byli, hetuju infarmacyju čakajuć, pieražyvajuć za vašyja kłopaty, radujucca vašym pośpiecham. Vy pakazvali nam, jak treba hanarycca svaim pachodžańniem, svaim žyćciom, svaimi prafiesijnymi pośpiechami. Pakazvali, što našyja karani — heta naša bahaćcie».

Juraś Ziankovič začytaŭ zvaroty ad dvuch kandydataŭ u prezidenty Biełarusi: Alaksandra Milinkieviča i Alesia Michaleviča.

Alaksandr Milinkievič: «Ščyra zyču vialikich plonaŭ i ŭdałych inicyjatyvaŭ u vašym spatkańni, a taksama mocy, pośpiechaŭ kožnamu z vas. Žyvuć biełarusy! Žyvie Biełaruś!»

Aleś Michalevič: «Šanoŭnyja siabry! Stanovišča Biełarusi istotna adroźnivajecca ad taho, što było ŭ 2001 i 2006 hadach. Kanflikt z Rasijaj pryvioŭ da taho, što cisk na biełaruskija ŭłady adbyvajecca jak z zachadu, tak i z uschodu. A heta adčyniaje mahčymaści da źmieny ŭłady ŭ krainie i pierachodu da demakratyi. U hetaj situacyi, kali źjaŭlajecca realnaja mahčymaść adbudavać biełaruskuju demakratyju, jak nikoli robicca istotnaj praca biełaruskaj dyjaspary za miažoj, asabliva ŭ Złučanych Štatach Amieryki…. Razam my pieramožam! Žyvie Biełaruś!»

Vitalnyja słovy ad Niny Šydłoŭskaj, staršyni Rady MHA «Zhurtavańnie Biełarusaŭ Śvietu «Baćkaŭščyna» začytała hościa ź Biełarusi Maryna Jaŭsiejčyk: «Ščyra spadziajemsia, što hetaje nadzvyčaj važnaje dla biełaruskaj hramady Amieryki mierapryjemstva pryniasie ŭdzielnikam dobryja ŭražańni, radasnyja emocyi, plon biełaruskaj spravie… Vierym, što dziakujučy vašym namahańniam i vašaj niastomnaj pracy biełaruskaje žyćcio ŭ Amierycy nikoli nie zhaśnie! Žyvie Biełaruś!».

Dźmitryj Eljaševič, były staršynia Zhurtavańnia Biełarusaŭ Kanady (ZBK), začytaŭ vitalnyja słovy ad siabroŭ Kanadskaha siektaru Rady BNR: «Siabry kanadskaha siektaru rady BNR ščyra vitajuć vas z tradycyjnym forumam biełarusaŭ, jakija žyvuć u Paŭnočnaj Amierycy. My vierym, što sustreča budzie vartasnaj, budzie nadalej słužyć jadnańniu biełarusaŭ za miažoj».

Sa ščyrymi słovami źviarnuŭsia da biełarusaŭ Aleś Kot — pradstaŭnik ZBK:

Tradycyja nie pierarvałasia. Tak było, jość i budzie! Bo na toje naša supolnaja vola. My jość paŭnamocnyja pradstaŭniki Zhurtavańnia Biełarusaŭ Kanady, delehacyi vaśmidziesiaci adcotkaŭ dziejsnych siabroŭ Zhurtavańnia. I tamu my majem paŭnamoctvy vinšavać usich udzielnikaŭ sustrečy z tym, što jana adbyłasia. I jašče, maju śmiełaść i honar skazać: kali my z BAZA — nikoli paraza, zaŭždy pieramoha! Hurtujciemsia razam! I budzie nas mnoha! United we stand!»

Ihar Łamaka z Vankuviera: «Kaardynacyjny kamitet biełarusaŭ Kanady vitaje ŭsich biełarusaŭ, jakija pryjechali na 29-ju Sustreču biełarusaŭ Paŭnočnaj Amieryki ŭ Saŭt Ryvier. Dla ŭsich važna, asabliva ŭ hety čas, prabačyć kryŭdy i ŭźjadnacca dla ahulnaj spravy. Tradycyjna BAZA źjaŭlajecca orhanam biełarusaŭ u ZŠA, i my spadziajomsia, što BAZA paśpiachova pieražyvie siońniašnija ciažkaści i budzie praciahvać spravu našych prodkaŭ. My, biełarusy, majem hordaść, rozum i bahatuju historyju. I my vartyja zaniać adpaviednaje miesca siarod inšych narodaŭ».

Viačka Stankievič pieradaŭ pryvitańnie ad Rusłana Kačatkova, staršyni Kaardynacyjnaha Kamiteta biełarusaŭ Kanady.

Dalej słova ŭziała Zinaida Himpielevič — prafiesar kanadskaha univiersiteta ŭ Vaterłoo i siabra Biełaruskaha Instytuta Navuki i Mastactva ŭ Kanadzie:

«…Chaču ščyra padziakvać amierykanskaj BAZIE i jaje staršyni — spadaru Viačku, i asabliva jaho cudoŭnaj kamandzie, za takuju sustreču, za mahčymaść pabyć razam, pahladzieć adzin adnamu ŭ vočy…».

Pryvitańnie ad Alesia Arciuchoviča z biełaruska-amierykanskaha zadzinočańnia ŭ Paŭdniovaj Kalifornii pieradała Maryja Sadoŭskaja.

Viačka Stankievič začytaŭ dla aŭdytoryi pryvitańnie Siarhieja Ramaniuka — kiraŭnika Adździełu BAZA ŭ Ahajo, vice-prezidenta centra «Połacak» (Kliŭlend): «Pavažanyja siabry, prymicie našyja siońniašnija vinšavańni i pažadańni pośpiechaŭ u zachavańni patryjatyčnaj tradycyi biełaruskaj emihracyi. Žyvie Biełaruś!».

Apošniaje pryvitańnie prahučała ad Siamiona Šareckaha — byłoha Staršyni Viarchoŭnaha Savieta Biełarusi, jaki žyvie ŭ Kalifornii.

Paśla pryvitalnych słovaŭ, staršynia Hałoŭnaj upravy Biełaruska-Amtrykanskaha Zadzinočańnia sp. Viačka Stankievič zaprasiŭ usich prysutnych u zale na kanfierencyju sutrečy «Rola biełaruskaj dyjaspary — raniej i ciapier», maderataram jakoj byŭ historyk i žurnalist Janka Zaprudnik. Pramoŭcami byli: Vitaŭt Kipiel — Biełaruski Instytut Navuki i Mastactva, aŭtar knižak pra dyjasparu ŭ ZŠA; Taćciana Kułakievič — studentka fakulteta historyi, daśledčyca Congressionsl Records; Hanna Surmač — archivist fundacyi Krečeŭskaha, arhanizatar Pieršaha Źjezdu Biełarusaŭ Śvietu ŭ 1993 h.; Aleh Hardzijenka — daśledčyk historyi biełaruskaj dyjaspary; Dzimitryj Eljaševič — były staršynia ZBK. Skončyła kanfierencyju svaim vystupam Ivonka Surviłła, staršynia Rady BNR.

Dalej pa prahramie adbyłosia pryniaćcio rezalucyi Sustrečy, paśla čaho adbyŭsia śviatočny kancert, viadučaj jakoha była Ała Orsa-Romano. Siarod vystupoŭcaŭ byli: Iryna Mazyleva, opiernaja śpiavačka, Śviatłana Litvinava praśpiavała narodnyja pieśni, Valancin i Taćciana paradavali prysutnych muzykaj i pieśniami. Svaim talentam ździvili hledačoŭ dzietki! Vielmi pryhoža čytali vieršy, śpiavali piesieńki dy tančyli.

Uviečary adbyłasia nievialikaja viečaryna. Halina Padleski začytała tvor Volhi Ipatavaj «Žmienia ŭspaminaŭ pra Łarysu Hienijuš». Siarhiej Šupa, žurnalist, prezientavaŭ novuju knihu — «Dni adnaho žyćcia» — dziońniki Zory Kipiel. Mieła słova i Zina Himpielevič, prafiesar univiersiteta Vaterłoo, aŭtar knihi «Biełaruska-habrejskija piśmieńniki 20-ha stahodździa».

Zavieršyłasia sustreča filmami, muzykaj dy supolnymi śpievami.

• 0
• 0
• 0
• 0
• 0
• 0
• 0
• 0