Palityčny ahladalnik Alaksandr Kłaskoŭski dzielicca ŭražańniami pra vystup kandydata ŭ prezidenty ad partyi BCHD Vitala Rymašeŭskaha.
Palityčny ahladalnik Alaksandr Kłaskoŭski dzielicca ŭražańniami pra vystup kandydata ŭ prezidenty ad partyi BCHD Vitala Rymašeŭskaha.
«Vystup nie pravalny. Ja b skazaŭ, jon dobra spraviŭsia z zadačaj prasoŭvańnia brenda BCHD, ale voś nakolki prasunuŭ svoj asabisty brend — hetaje pytańnie zastajecca adkrytym. Tut varta ŭličvać, što balšynia kandydataŭ prosta nieviadomaja šyrokaj publicy. I elemientarny pryjom — paŭtaryć svajo imia niekalki razoŭ — nie byŭ vykanany. Nie było pramoŭlena niekalki razoŭ «ja — Vital Rymašeŭski». Ja ŭpeŭnieny, što nie ŭsie prostyja vybarščyki, abyvacieli zapomnili jaho proźvišča.
Pakolki ŭ Vitala adnoj z klučavych zadač była prapahanda idejaŭ BCHD, to heta było zroblena dastatkova ŭdała. Adnak, pa‑mojmu, byŭ trochu pierahin, tamu što sam kandydat zastavaŭsia ŭ cieni. Voś jość partyja, jość takaja siła, jakaja prapahanduje takija voś idei. Adnak heta ž kankretna Vital Rymašeŭski pretenduje na vyšejšuju pasadu, za jaho pavinny addavać ci nie addavać svoj hołas. Voś akurat arhumientacyi na karyść piersanaža hetych vybaraŭ, mnie zdajecca, brakavała.
Viedajecie, Mierkiel taksama ŭ Hiermanii ŭznačalvaje chryścijanskich demakrataŭ, adnak padobnuju leksiku z partyjnaj prahramy i słovy pra chryścijanskija pryncypy jana ŭžyvaje značna radziej.
Ja nie ździŭlusia, kali prosty rabaciaha potym žoncy skaža: śviatar, musić, vystupaŭ pa telebačańni! Kaniečnie, troški ŭtryruju, adnak, pa‑mojmu, varta ŭličvać, što elektarat, i nie tolki biełaruski, jak kažuć palitołahi, dumaje straŭnikam (heta nie abraza, a kanstatacyja).Voś takich rečaŭ, niejkich pierakanaŭčych žyćciovych, pobytavych arhumientaŭ było małavata. Naprykład, što hetyja partyjnyja pryncypy daduć dziela dabrabytu, dziela taho kab lepiej žyŭ kankretny čałaviek — voś hetaha brakavała.
Praŭda, druhaja častka vystupu, jana była ŭ dobrym sensie bolej papulisckaju. Usio ž taki peŭnaja kankretyka ekanamična‑sacyjalnaha kštałtu prahučała.
Tezy pryvabnyja. Naprykład, abiacańnie zrabić ekanomiku, jak u Hiermanii. Adnak kazać, što hrošy na reformy my znojdziem za košt taho, što vykaranim karupcyju, — heta schiema, napeŭna, prastavataja.
Da plusaŭ možna adnieści toje, što Vital trymaŭsia ŭ kadry dosyć upeŭniena, była žestykulacyja, była nahladnaja ahitacyja. Padajecca, što ŭ kamandzie dobra vyvučyli chrestymatyjny vystup Kazulina 2006 hoda.Va ŭsiakim razie, hetaje razryvańnie ilustracyjaŭ: Kazulin rvaŭ hazietu «Sovietskaja Biełoruśsija», a Rymašeŭski — partrety dyktataraŭ. Hety chod skapijavany z Kazulina. I heta śviedčyć pra toje, što kamanda Rymašeŭskaha rychtavałasia, vyvučyli vopyt papiarednikaŭ, technałohii adpaviednyja pijaraŭskija. Heta vyhladała piśmienna.
Chaču padkreślić, nie varta ŭ pryncypie pierabolšvać mahčymaści takoj karotkačasovaj ahitacyi ŭ takim niaŭdziačnym žanry, jak «havarkija hałovy». Toje, što heta manałoh, što niama ŭnutranaj dramaturhii — heta rezka zvužvaje mahčymaści kandydataŭ. 15‑20 chvilin — dalej hladač paprostu stamlajecca.
Kali paraŭnać z vystupam Michaleviča: toj nie nadta ŭpeŭniena trymaŭsia, asabliva napačatku, ale Alesia vyratavała, što jon pabudavaŭ vystup u vyhladzie pytańniaŭ i adkazaŭ. Niahledziačy na prydumanyja pytańni, jamu ŭdałosia dramatyzavać vystup.
Paŭtaru, «havarkija hałovy» — vielmi niaŭdziačny žanr. Na žal, tut cudaŭ nie davodzicca čakać, bo kali na ekranie niama apazicyi ad vybaraŭ da vybaraŭ i niama siužetaŭ palityčnaha žyćcia, to ciažka ŭ takich vystupach «havarkich hałovaŭ» zrabić niejkuju revalucyju u mazhach ludziej.
Treba jašče skazać, što kandydaty rvalisia ŭ žyvy efir, adnak heta žorstkaja reč i jana sapraŭdy raspranaje čałavieka. Treba mieć vialiki dośvied, kab trymacca ŭ kadry, kab nie biehali vočy. U Michaleviča było jašče horaj, čym u Rymašeŭskaha, bo jon čytaŭ u kadry. Mnie tak padałosia, što i z hrymam i sa śviatłom papracavali ŭ abodvuch vypadkach nie vielmi dobra.
I ekśpierty pra heta papiaredžvali: nie treba dumać, što pierad kandydatami chtości budzie ščyravać i staracca zrabić vyjhryšny malunak. Nichto śpiecyjalna niejkich vyjhryšnych kamfortnych umovaŭ u studyi nie stvaraŭ i nie budzie stvarać, tamu treba, vidać, rychtavaccca kamandaj da takich vystupaŭ. Navat až da taho, kab niechta z kamandy vaziŭ z saboj pudru i rabiŭ adpaviedny makijaž pierad efiram. Budziem spadziavacca, što nastupnyja kandydaty pra heta pakłapociacca.
Zapomniŭsia vydatny afaryzm Rymašeŭskaha, jaki napeŭna ciapier usie buduć cytavać: «Abirali prezidenta — abrali cara».Na padobnych afaryzmach u 2006 hodzie hruntavaŭsia vystup Kazulina. Ludzi takoje zapaminajuć, heta čaplaje. Vystup Rymašeŭskaha moh by mieniej hruntavacca na chryścijanskich łozunhach, a mieć pabolej takich ćvikoŭ‑afaryzmaŭ. Heta syhrała b na karyść».
Kamientary