Niaklajeŭ: Ja nie budu stajać na asfalcie, u łyžy abuty

Kandydat u prezidenty Uładzimir Niaklajeŭ zajaviŭ u efiry Biełaruskaha radyjo, što jaho hatovy padtrymać «i Jeŭropa, i Rasija».

Vystupleńnie Niaklajeva ranicaj 23 listapada (doŭžyłasia 24 z adviedzienych 30 chvilin) było napoŭniena rezkimi acenkami i malaŭničymi vobrazami, a sam jon kazaŭ pra siabie pieravažna ŭ treciaj asobie.

«Ja toj samy Uładzimir Niaklajeŭ, i inšaha Uładzimira Niaklajeva ŭ Biełarusi niama. Ale ja ŭžo daŭno zajmajusia nie pieśniami, nie paezijaj, a palitykaj, bo paezija naša žyćcio moža ŭpryhožyć, ale nie źmianić. A ja chaču jaho źmianić, palepšyć i viedaju jak. I kali niechta vam budzie kazać, što

paet Uładzimir Niaklajeŭ mała što razumieje ŭ palitycy i nie moža być prezidentam — nie viercie, bo ja ŭžo dakazaŭ, što ja nasamreč palityk», — skazaŭ Niaklajeŭ.

Jon adznačyŭ, što stvaryŭ hramadzianskuju kampaniju «Havary praŭdu!» — «samuju mocnuju hramadskuju arhanizacyju ŭ Biełarusi». Kandydat paviedamiŭ, što jaho rejtynh składaje 17% — «heta značna bolš, čym rejtynh luboha inšaha sapiernika Łukašenki». «Heta značyć, što ŭ Niaklajeva najbolšy šans na pieramohu na prezidenckich vybarach», — skazaŭ jon.

Niaklajeŭ paabiacaŭ, što

«kožnaja maci pry naradžeńni dziciaci budzie atrymlivać maciarynski kapitał, roŭny 25 tys. dołaraŭ».

«Heta nie aznačaje, što hetyja hrošy buduć vydadzienyja ŭsie adrazu, kab ščaślivy baćka adnojčy ŭziaŭ ich dy prapiŭ. Jany buduć vydatkoŭvacca pastupova i mienavita na patreby dziciaci», — zajaviŭ kandydat.

Akramia taho, buduć viernuty ŭkłady nasielnictva, zroblenyja ŭ savieckija časy, — «kali nie ŭsie adrazu, dyk častkova, ci kampiensujem pasłuhami, tavarami

— tymi, jakija niekali vy, źbirajučy tyja hrošy, chacieli kupić». U vypadku abrańnia prezidentam kandydat maje namier vypłačvać kampiensacyi dzieciam vajny, jak heta robić Ukraina.

Niaklajeŭ vykazaŭ abureńnie skasavańniem ilhot dla piensijanieraŭ, «čarnobylcaŭ», studentaŭ dy inšych katehoryj hramadzian. «Ci tak užo lubić dziaržava svaich hramadzianaŭ, jak pra toje raspaviadaje jaje kiraŭnik? Jak vynikaje nie sa słovaŭ Łukašenki, a ź jahonych dziejańniaŭ, lubić jon nie piensijanieraŭ i nie studentaŭ, a tolki samoha siabie, prezidenta», — ličyć Niaklajeŭ.

«U nas usio padparadkoŭvajecca palitycy, dakładniej tamu, što prydumaje kiraŭnik biełaruskaj dziaržavy.

A jon prydumaŭ stabilnaść, jakaja nasamreč zastoj.

Tamu hetaksama, jak i ŭ Savieckim Sajuzie, usio ŭ nas chutka, užo ŭ nastupnym hodzie, abvalicca: spačatku ekanomika, paśla palityka, ideałohija, a potym i sama dziaržava. Kali vy hetaha nie chočacie, hałasujcie za Niaklajeva, a heta značyć — za raźvićcio», — zaklikaŭ kandydat.

«Łukašenka — jak toj burak čyrvony,

jahonaja śviadomaść zastajecca savieckaj, i jon užo niazdolny jaje pamianiać, tamu treba mianiać jaho samoha, jon staŭ pieraškodaj na našym šlachu. Nie treba bajacca pieramien. Vuń u susiednich krainach kolki za apošni čas pamianiałasia ministraŭ, prezidentaŭ, i što stałasia kiepskaha? Ničoha. Naadvarot, tyja krainy z novymi ludźmi tolki nabyvajuć dynamiku, enierhiju, ruch i raźvivajucca tak, što jašče trochi, i ich užo budzie nie dahnać», — skazaŭ Niaklajeŭ.

Jon zajaviŭ, što budzie zachavana ŭsio dobraje, što było zroblena pry Łukašenku, «ale taho niedastatkova, kab zachavać Biełaruś». Na dumku Niaklajeva, treba źmianić palityčnuju sistemu, raździalić haliny ŭłady, pakinuć u minułym strach, jaki panuje ŭ hramadstvie.

«Ja, novy prezident Uładzimir Niaklajeŭ, admianiu hety strach.

Kožny budzie volny kazać toje, u čym pierakanany, i tak, jak ličyć patrebnym, dziejničać. Pravy čałavieka buduć achoŭvacca zakonam nieparušna», — skazaŭ Niaklajeŭ. Jon paabiacaŭ pravieści «takuju palityčnuju reformu, jakaja navat tearetyčna nie dazvolić viarnucca da dyktatury — nikoli i nikomu».

«U vas u kožnaha budzie i svaja łyžka, i svoj kacioł, i svaja kaša ŭ im. Pieršym zakonam, jaki raspracuje parłamient i padpiša prezident, budzie zakon pra mały i siaredni biźnies.

Mienavita jon byŭ ruchavikom ekanomiki va ŭsich krainach, jakija vychodzili z savieckaj sistemy, i pryvioŭ da pośpiechu», — zajaviŭ Niaklajeŭ.

«Ja viarnu zdarovy sens va ŭsio, što pavinna rabicca ŭ krainie. Achova zdaroŭja stanie pieršačarhovym abaviazkam dziaržavy, a nie druhasnym. Va ŭsim i zaŭsiody novy prezident Uładzimir Niaklajeŭ budzie kiravacca metazhodnaściu. Ja nie budu stajać na asfalcie, u łyžy abuty, i nie zmušu salihorskich šachcioraŭ biehać pa lodzie z adbojnymi małatkami. Ja nie suprać ladovych pałacaŭ, ale ž nie zamiest lakarniaŭ», — skazaŭ kandydat.

Jon ličyć, što raźvivać adnosiny ź Jeŭrasajuzam treba, «ale ž nie koštam hetkaha rezkaha pavarotu ad Rasii».

«I kali my navat źbiaromsia niekali ŭvajści ŭ Jeŭraźviaz, dyk i ŭ hetym nam Rasija moža stać sajuźnicaj: joj nieabchodna hetak ža pieravodzić ekanomiku na novyja, vysokija technałohii, jak i nam», — zajaviŭ Niaklajeŭ.

Kandydat skieptyčna pastaviŭsia da prapanovy ES vydatkavać Biełarusi 3 młrd jeŭra ŭ vypadku praviadzieńnia ciapierašniaj uładaj sumlennych vybaraŭ: «Nie vyrašać 3 młrd jeŭra prablem Biełarusi, zamiežny doŭh jakoj siońnia 25 młrd dołaraŭ. A voś pierakryć z novaha hoda rasijski haz i pakinuć nas na zimu ŭ choładzie hetyja try miljardy mohuć. Ja pierakanany, što Jeŭraźviaz, jaki za try miljardy patrabuje ad Łukašenki demakratyzacyi Biełarusi, budzie ŭ čakańniach svaich padmanuty».

Aŭdyjozapis tut

• 0
• 0
• 0
• 0
• 0
• 0
• 0
• 0