Cana amierykanskich sankcyj dla Biełarusi — sotni miljonaŭ dalaraŭ

Na hetym tydni Vašynhton abviaściŭ ab uviadzieńni ekanamičnych sankcyj u dačynieńni da Minska. Amierykanskija sankcyi zakranuć pradpryjemstvy, jakija ŭvachodziać u kancern «Biełnaftachim».

Ab uviadzieńni sankcyj biełaruskamu boku paviedamiŭ na hetym tydni Minfin ZŠA.

Upieršyniu ekanamičnyja sankcyi ŭ dačynieńni da kancerna «Biełnaftachim» byli ŭviedzienyja jašče ŭ listapadzie 2007. Tady Vašynhton, reahujučy na niežadańnie aficyjnaha Minska vyzvalać palitviaźniaŭ, zabłakavaŭ usie bankaŭskija rachunki «Biełnaftachima», jakija znachodziacca pad jurysdykcyjaj ZŠA.

U vieraśni 2008 Vašynhton prypyniŭ dziejańnie sankcyjaŭ u dačynieńni da pradpryjemstvaŭ «Biełnaftachima». Padstavaj dla hetaha stali «pazityŭnyja kroki» z boku Minska, a mienavita — vyzvaleńnie ź biełaruskich turmaŭ palitviaźniaŭ: Alaksandra Kazulina, Andreja Kima i Siarhieja Parsiukieviča.

Paciapleńnie adnosinaŭ z Zachadam, jakoje nazirałasia ŭ 2008—2010 hh., davała Vašynhtonu padstavy prałanhiravać maratoryj na sankcyi. Apošni raz maratoryj na sankcyi ŭ dačynieńni AAT «Łakafarba» i AAT «Połack-Škłovałakno» byŭ pradoŭžany ŭ kancy listapada 2010.

Dziejničać maratoryj pavinien byŭ da 31 maja 2011. Ale na hetym tydni Ministerstva finansaŭ daterminova adklikała rašeńnie, jakoje dazvalała pradpryjemstvam «Biełnaftachima» pracavać z amierykanskimi kontrahientami. Sankcyi Vašynhtona ŭ dačynieńni da biełaruskich pradpryjemstvaŭ pačynajuć dziejničać 11 lutaha.

Biełaruskija dziaržaŭnyja ŚMI pastaralisia pakazać, što ŭ tym, što zdaryłasia, niama vialikaj trahiedyi.

Vysnova, da jakoj pryjšło, u pryvatnaści, biełaruskaje telebačańnie, była adnaznačnaj — straty biełaruskaha boku ad amierykanskich sankcyj nievialikija. Maŭlaŭ, i biez Amieryki pražyviem.

Adnak abjektyŭnyja faktary śviedčać ab tym, što nastupstvy ad amierykanskich sankcyj dla biełaruskaha boku buduć dosyć surjoznymi.

Pa-pieršaje, amierykanski rynak, jak pakazvaje dośvied, dastatkova pierśpiektyŭny dla kancerna «Biełnaftachim», i sankcyi tut vidavočna niedarečy.

Internet-hazieta Naviny.by maje dadzienyja abjomie pastavak pradukcyi kancerna «Biełnaftachim» na amierykanski rynak za apošnija hady. Dynamika pakazvaje, što da ŭviadzieńnia pieršych sankcyj u listapadzie 2007 «Biełnaftachimu» ŭdavałasia naroščvać abjom ekspartu ŭ ZŠA.

U chranałahičnym paradku padziei raźvivalisia nastupnym čynam. Abjom pastavak «Biełnaftachima» na amierykanski rynak u 2005 hodzie — 152,6 młn dalaraŭ, u 2006-m — 383,3 młn dalaraŭ, u 2007-m — 300,6 młn dalaraŭ, u 2008-m — 97, 2 młn dalaraŭ, 2009-m — 9,98 młn.

Takim čynam, vidavočna, što amierykanskija sankcyi pazbavili Biełaruś prybytku na sotni miljonaŭ dalaraŭ. A z ulikam taho, što «Biełnaftachim» vystupaŭ hałoŭnym eksparcioram biełaruskaj pradukcyi ŭ ZŠA, to možna kanstatavać i inšaje: sankcyi ŭ dačynieńni da kancerna pryviali da prykmietnaha panižeńnia biełaruskaha ekspartu ŭ hetuju krainu ŭ cełym.

Jość u hetaj historyi i jašče adna važnaja akaličnaść — dalaravaja.

Na zakrytaj dla presy kanfierencyi pa naftapraduktach, na jakuju ŭvosień 2010 zdoleŭ trapić karespandent Naviny.by, havorka išła pra toje, što pakupniki biełaruskich naftapraduktaŭ niasuć valutnyja ryzyki.

Sprava ŭ tym, što paśla sankcyj z boku Vašynhtona biełaruski bok zamiest dalara pačaŭ vykarystoŭvać jeŭrapiejskuju valutu ŭ handli naftapraduktami. Adnak z pryčyny rezkich vahańniaŭ kursu jeŭra hetaja akaličnaść nakładaje na pakupnikoŭ biełaruskaj pradukcyi cenavyja ryzyki. Tym bolš što biełaruskija naftapradukty kontrahient, jaki znachodzicca za miežami Biełarusi, atrymlivaje nie adrazu, a tolki praź miesiac paśla zaklučeńnia ŭhody pa ich nabyćci.

Z ulikam usich pieraličanych abstavinaŭ

atrymlivajecca, što režym sankcyj z boku ZŠA nie taki ŭžo i biaskryŭdny dla Biełarusi, jak heta chočuć pradstavić.

Staršy analityk Biełaruskaha instytuta stratehičnych daśledavańniaŭ (BISS) Dzianis Mieljancoŭ miarkuje, što amierykanskija sankcyi ŭ dačynieńni da Biełarusi praisnujuć da taho času, pakul biełaruskija ŭłady nie pojduć na sastupki ŭ pytańni vyzvaleńnia palitviaźniaŭ i źniaćcia ź ich abvinavačvańniaŭ.

«Heta hałoŭnaja ŭmova. Jość taksama i dadatkovyja — palapšeńnie situacyi z pravami čałavieka, svaboda schodaŭ, reforma vybarčaha zakanadaŭstva i h.d.», — nahadvaje ekśpiert.

Na dumku palitołaha, całkam sankcyi mohuć być skasavanyja tolki paśla prykmietnaha palapšeńnia situacyi z demakratyjaj u krainie. «Paśla vyzvaleńnia palitviaźniaŭ sankcyi, chutčej za ŭsio, tolki prypyniać», — miarkuje Dzianis Mieljancoŭ.

Biełaruski MZS, jak viadoma,

pahražaje siońnia «praparcyjnymi i adekvatnymi mierami» ŭ adkaz na sankcyi zachodniaha śvietu. Palityčnych sankcyj sapraŭdy možna čakać.

Adnak ekanamičnyja sankcyi ŭ dačynieńni da ZŠA biełaruskija ŭłady ŭvodzić nie navažylisia. Jak vynik, ekspart biełaruskaj pradukcyi ŭ ZŠA ŭpaŭ u niekalki razoŭ (z 249,4 młn dalaraŭ u 2005-m da 41,3 młn. dalaraŭ u 2009-m), a voś impart tolki vyras (z 255,8 młn dalaraŭ u 2005-m da 382,2 młn dalaraŭ u 2009-m). Takim čynam,

Biełaruś u vyniku abmiežavalnych mieraŭ atrymała hłyboka admoŭnaje salda ŭ handli z ZŠA. Choć u 2006-m jano było navat stanoŭčym.

• 0
• 0
• 0
• 0
• 0
• 0
• 0
• 0