Navošta rasijskija biznesoŭcy skuplajuć hateli ŭ biełaruskaj hłybincy?

Rasijski biznes ukaraniajecca va ŭsie novyja śfiery biełaruskaj ekanomiki. U minułym hodzie rasijcy pačali skuplać hateli ŭ rehijonach krainy.

Aktyŭnaść u haściničnym siektary ŭ 2010 hodzie pakazała kampanija Amaks Hotels & Resorts. U pačatku minułaha hoda jana kupiła kantrolny pakiet hatela «Babrujsk» u samym bujnym rajonnym centry Biełarusi, a ŭ śniežni 2010 hoda — 25% akcyj AAT «Hostinica „Mohilov“». Ahułam dźvie kupli abyšlisia rasijcam u sumu kala 2,5 młn dalaraŭ. Pry hetym jany abaviazalisia ŭkłaści dadatkovyja hrošy ŭ rekanstrukcyju i raźvićcio haściničnych kompleksaŭ, a taksama padniać ich da 3-zorkavaha ŭzroŭniu.

Amaks Hotels & Resorts naležyć hrupie piermskich biznesoŭcaŭ. Jana i ŭ Rasii robić akcent na rehijony. 15 rasijskich hatelaŭ kampanii raźmieščanyja ŭ takich haradach, jak Pierm, Uładzimir, Kazań, Ufa, Biełharad, Rastoŭ-na-Donie. Jašče adzin napramak dziejnaści — sanatoryi. Samy bujny nabytak Amaks Hotels & Resorts — sanatoryj u Jesientukach.

U Biełarusi kampanija chacieła b pakul zasiarodzicca na haradskich hatelach dla dziełavoha turyzmu, nie abmiažoŭvajučysia Mahiloŭskaj vobłaściu. Jašče ŭ pačatku 2010 hoda, kamientujučy pieršy nabytak u Babrujsku, adzin z suŭładalnikaŭ Amaks Hotels & Resorts i jaje hienieralny dyrektar Dźmitryj Złatkin zajaviŭ, što pahadnieńni pa ŭdziele ŭ pryvatyzacyi haścinic taksama zaklučanyja z administracyjami Homielskaj, Hrodzienskaj, Viciebskaj i Minskaj abłaściej.

Na dumku Dźmitryja Złatkina,

biełaruski rynak «niedaacenieny i vielmi pierśpiektyŭny».

Jak padkreślivajuć udzielniki rynku, u «vysoki» siezon i padčas bujnych dziełavych i masavych mierapryjemstvaŭ siaredniaja zapaŭnialnaść haścinic dasiahaje 75–80%, a 3-zorkavyja haścinicy, byvaje, zapaŭniajucca na 100%. Vysokaja prybytkovaść układańniaŭ u hatelnuju nieruchomaść padahravaje cikavaść inviestaraŭ da realizacyi takich prajektaŭ u Biełarusi.

Ekśpierty «Zaŭtra tvajoj krainy» taksama adznačajuć, što haściničny siektar u Biełarusi abdzieleny ŭvahaj inviestaraŭ. Bolšaść biełaruskich haścinic byli pabudavanyja ŭ 1950–1980-ch hadach.

Kala 70% ciapierašniaj hatelnaj bazy znachodzicca va ŭłasnaści dziaržavy. Jana praktyčna nie padtrymlivaje pryvatnuju inicyjatyvu ŭ hetym siektary, a ajčynny biznes navat nie sprabuje dakazać, što hetuju inicyjatyvu treba zaachvočvać i raźvivać.

Jak pakazčyk kankurentazdolnaści — pa dadzienych na krasavik 2010 hoda, z prykładna 300 hatelaŭ, jakija isnujuć u Biełarusi, tolki 33 paśpiachova prajšli praceduru siertyfikacyi i kłasifikacyi na katehoryi ad adnoj da piaci zorak. Ź ich piać zorak mieli hateli «Jeŭropa» i Crowne Plaza. Čatyry zorki — u troch haścinic: «Minsk», haściničnych kompleksaŭ «Viktoryja» ŭ Minsku i «Łučiesa» u Viciebsku. Siertyfikaty na try zorki mieli 24 haścinicy, dźvie zorki — try haścinicy, i adna haścinica mieła adnu zorku.

Kala pałovy z hatelaŭ, jakija atrymali «zorki», znachodzicca ŭ Minsku, ź ich tolki adzin pryvatny hatel — 5-zorkavy Srowne Plaza.

Jość inšyja biełaruskija biznesoŭcy, jakija apošnim časam pačali ŭkładać srodki ŭ hatelny biznes. Naprykład, staršynia Sajuza palakaŭ Biełarusi Stanisłaŭ Siamaška, jaki adkryŭ pad imiannym brendam haścinicu ŭ Hrodnie.

Ale, jak pradkazvajuć ekśpierty «Zaŭtra tvajoj krainy»,

u śviatle poŭnaha adkryćcia biełaruskaha rynku ŭ ramkach Adzinaj mytnaj prastory ŭmovy dla raźvićcia pradprymalnickaj inicyjatyvy ŭ Biełarusi buduć paharšacca.

• 0
• 0
• 0
• 0
• 0
• 0
• 0
• 0