Makiej zhadvajecca ŭ «natatnikach Bierazoŭskaha»

U Rasii bujny skandał, jaki moža pierakinucca na Biełaruś: rasijskija siłaviki zajavili pra raskryćcio sietki padpolnych kazino, ślady ad jakoj viaduć da BAB. I pra zachop šmatlikich dakumientaŭ.

14 lutaha rasijskaja milicyja zajaviła pra raskryćcio sietki padpolnych kazino ŭ Maskoŭskaj vobłaści. Skandał staŭ abrastać padrabiaznaściami. Akazałasia, što sietku kryšavaŭ namieśnik prakurora vobłaści.

Arhanizataram sietki vystupaŭ niejki Ivan Nazaraŭ. U hetaha 30-hadovaha działka skanfiskavana šmat kaštoŭnaściaŭ i dakumientaŭ. Milicyja pajšła pa łancužku abšukvać ofisy biznesoŭca.

U jaho centralnym ofisie ŭ halerei «Tryumf» u centry Maskvy znajšlisia karciny Pikasa i Rembrandta ahulnym koštam zvyš piaci miljonaŭ dalaraŭ.

Što cikava, častka hetych dakumientaŭ adrazu trapiła ŭ ŚMI. Ich apublikavała «Komsomolskaja pravda». Heta pakazvaje, što za skandałam moža niešta stajać. I što taksama cikava — častka apublikavanych dakumientaŭ datyčać Biełarusi.

U pryvatnaści, vyjaŭleny natatnik. Pavodle «Komsomolskoj pravdy» jon moh naležać samomu Bierazoŭskamu. Ale analiz dastupnych staronak ź jaho śviedčyć chutčej pra toje, što im moh karystacca Nazaraŭ ci inšaja davieranaja asoba źbiehłaha aliharcha. «Uznať dla Bori» — havoryć adzin z zapisaŭ.

Na adnoj z apublikavanych staronak jość vyraznyja zanatoŭki, dzie zhadvajecca Makiej (proźvišča supadaje z proźviščam kiraŭnika Administracyi prezidenta Biełarusi, jaki ličycca lidaram prazachodniaj hrupoŭki ŭ atačeńni Łukašenki). Pobač zhadvajucca «Biełnaftachim», adnosiny Biełarusi z Hruzijaj i Kłaŭs Manhold — kiraŭnik Uschodniaha kamiteta niamieckaj ekanomiki, jaki byvaŭ u Minsku. Na druhoj staroncy, u liku apieracyj u krainach byłoha SSSR zhadvajecca pasiołak u Minsku.

Apieratyŭniki adznačajuć, što mnohija znojdzienyja papiery Barysa Bierazoŭskaha (jaki ciapier žyvie pad novym imieniem Płaton Jalenin) datavanyja kancom 2010 hoda. Nahadajem, z 20 vieraśnia 2001 hoda jon znachodzicca ŭ vyšuku ŭ RF i aficyjna pražyvaje ŭ Łondanie.

Pa słovach byłoha viaźnia biełaruskaha KDB amierykanskaha advakata Emanuiła Zielcera, Bierazoŭski asabista ŭdzielničaŭ u sudzie nad im dva hady tamu. Film NTV «Chrosny baćka» havaryŭ pra suviazi miž Łukašenkam i Bierazoŭskim.

Ciažka skazać, ci sapraŭdnyja hetyja dakumienty. Kali jany praŭdzivyja, heta śviedčyć pra suviazi najvyšejšych biełaruskich čynoŭnikaŭ z sumnieŭnymi działkami. Kali jany sfalšavanyja, heta aznačaje šmatchadovuju kambinacyju rasijskich śpiecsłužbaŭ, skiravanuju suprać kiraŭnikoŭ Biełarusi.

Čytajcie bolš pra spravu «papieraŭ Bierazoŭskaha» ŭ «Našaj Nivie» zaŭtra.

• 0
• 0
• 0
• 0
• 0
• 0
• 0
• 0