Pasolstva Rasii pra zaŭtrašni sud: U vypadku Parfiankova dokazy byli, na Breusa j Haponava — niama
Daradca rasijskaj ambasady ŭ Minsku Vadzim Husieŭ adkazaŭ na pytańni «NN».
22 lutaha ŭ sudzie Maskoŭskaha rajona biełaruskaj stalicy adbudziecca razhlad spravy rasijskich hramadzian Ivana Haponava i Arcioma Breŭsa. Ich abvinavačvajuć u aktyŭnym udziele ŭ tak zvanych «biesparadkach» 19 śniežnia 2010 hoda na płoščy Niezaležnaści Minska.Tady, jak viadoma, adbyłasia šmattysiačnaja manifiestacyja pratestu suprać kiravańnia Alaksandra Łukašenki.
Pieršapačatkova za ŭdzieł u akcyi pratestu, arhanizavanaj biełaruskaj apazicyjaj, byli asudžanyja 11 rasijskich hramadzian. Jany adbyli administratyŭnaje pakarańnie i byli vyzvalenyja, adnak dvoje ź ich, Ivan Haponaŭ i Arciom Breus, byli zatrymanyja paŭtorna. Ich źmiaścili ŭ SIZA pa vulicy Vaładarskaha i abvinavacili ŭ aktyŭnym udziele ŭ masavych biesparadkach.
Jak rasijskaje pasolstva bačyć situacyju? Ci buduć rasijskija dypłamaty prysutničać na pracesie? «Naša Niva» źviarnułasia pa kamientar u pasolstva Rasijskaj Fiederacyi ŭ Minsku. Na pytańni adkazaŭ daradca ambasady Vadzim Husieŭ.
«NN»: 22 lutaha adbudziecca sud nad rasijskimi hramadzianami Ivanam Haponavym i Arciomam Breusam. Na sudzie buduć prysutničać pradstaŭniki ambasady?
Vadzim Husieŭ: Tak, viadoma. Płanujecca, što na pasiedžańni budzie prysutničać rasijski konsuł.
«NN»: Z momantu pieršaha zatrymańnia rasijskich hramadzian prajšło ŭžo dva miesiacy. Ci pradprymała ambasada niejkija kroki, kab paŭpłyvać na los svaich hramadzian?
VH: Hetaja sprava była z samaha pačatku pad kantrolem našaj ambasady. Za udzieł u akcyi pratestu 19 śniežnia na płoščy Niezaležnaści byli zatrymanyja 11 rasijskich hramadzian. Jany atrymali administracyjnyja aryšty. Pradstaŭniki konsulstva pryvozili im pieradačy, nieabchodnyja leki. Infarmavali rodnych. Akazvali dapamohu takoha charaktaru.
Kali dva rasijskich hramadzianina byli zatrymanyja paŭtorna, rasijski bok vyrazna vykazaŭ svaju pazicyju pa hetym pytańni.
Była zajava prezidenta Dźmitryja Miadźviedzieva, aficyjnaja zajava MZS RF. My ličym, što I.Haponaŭ i A.Breus pavinny być vyzvalenyja.Supracoŭniki konsulstva mieli mahčymaść aznajomicca z pastanovaj śledstva. Našy advakaty sychodziacca na tym, što dokazaŭ aktyŭnaha ŭdziełu ŭ akcyi pratestu rasijskich hramadzian niama. Jany byli u toj viečar na płoščy Niezaležnaści, ale aktyŭnaha udziełu ŭ padziejach nie brali. Tamu pavinny być vyzvalenyja.
«NN»: Sud nad adnym z udzielnikaŭ padziej viečara 19 śniežnia na płoščy Niezaležnaści ŭ Minsku ŭžo adbyŭsia. Vasil Parfiankoŭ atrymaŭ čatyry hady kałonii strohaha režymu. U vypadku padobnaha prysudu dla rasijskich hramadzian, ambasada RF budzie pradprymać niejkija dziejańni?
VH: Ja by nie staviŭ voz napieradzie kania.
U vypadku z prysudam hramadzianinu Biełarusi byli dokazy jaho aktyŭnaha udziełu, byli videazapisy. Taksama Parfiankoŭ mieŭ sudzimaści, što akazała svoj upłyŭ na prysud.Zaraz budziem čakać aficyjnaj sudovaj pastanovy pa spravie našych suajčyńnikaŭ I.Haponava i A.Breusa.My ž adstojvajem pazicyju, što dokazaŭ aktyŭnaha udziełu našych hramadzian u pratestach niama. Tamu nastojvajem na ich vyzvaleńni. My nie majem namieru akazvać niejki cisk na biełaruski bok. My svaju pazicyju da biełaruskich uładaŭ danieśli.
Ciapier čytajuć
«Lena 20 rubloŭ» uziałasia za staroje: znakamitaja machlarka znoŭ razvodzić davierlivych biełarusaŭ3
Kamientary