Navučy kampjutar havaryć pa-biełarusku

Nacyjanalnaja hramadskaja kampanija «Budźma biełarusami!» z nahody Suśvietnaha dnia rodnaj movy prezientavała novy prajekt — «Budźma z movaj!». Na dumku arhanizataraŭ, prajekt dapamoža ŭsim karystalnikam kampjutaraŭ zručniej i raznastajniej užyvać štodnia biełaruskuju movu. Ideja ažyćciaŭlajecca z udziełam studyi dyzajnu «Adliha».

Kaardynatar kampanii «Budźma biełarusami!» Alena Makoŭskaja zaznačaje: «Z adnaho boku, my padtrymlivajem ludziej, jakija karystajucca biełaruskaj movaj u štodzionnym žyćci i prosta nie majuć biełaruskich litar na kłavijatury. I dla vučniaŭ siaredniaj škoły, i dla piśmieńnikaŭ, i dla navukoŭcaŭ — prablema dla ŭsich adna. Vypusk takoj pradukcyi — demanstracyja prahału ŭ hetym siehmiencie biełaruskaha rynku i zapuściŭšy prajekt, my spadziajemsia padšturchnuć miascovych vytvorcaŭ da vypraŭleńnia biahučaj situacyi».

Prajekt «Budźma z movaj!» aryjentavany na biełaruskaha juziera.

Adziny kamplekt litar uklučaje ŭsie movy, najbolš zapatrabavanyja sučasnymi biełarusami: biełaruskuju, anhlijskuju, rasijskuju, a taksama ŭkrainskuju dy polskuju.

Stvaralniki ŭniviersalnaj raskładki dla kłavijatury pakłapacilisia i pra amataraŭ biełaruskaj łacinki, zrabiŭšy nalepki jak z kiryličnymi, tak i z łacinskimi litarami. Dla biełaruskaha karystalnika šmatmoŭnaść źjaŭlajecca štodzionnaj realijaj, tamu tolki takaja kłavijatura moža zadavolić jahonyja patreby. Biełaruskija «I», «Ŭ» i apostraf «'" pobač z łacinskimi «Š», «Č" i «Ŭ« — realny ŭzor taho, jak pryncyp «adnaho akna» pavinien być realizavany dla biełaruskich karystalnikaŭ kampjutaraŭ, zaznačajuć aŭtary prajekta.

Anatol Łazar, kiraŭnik studyi dyzajnu «Adliha», kaža, što hałoŭnaja meta prajektu — zabiaśpiečyć karystalnikaŭ zručnym instrumientam vykarystańnia rodnaj movaj na kampjutary i adpaviednaj raskładkaj. «Čamu, kali vam treba litara „Ŭ“, vy vymušanyja naciskać knopku z nadpisam „Ŝ“ i ŭvieś čas trymać u śviadomaści, što pad hetaj rasijskaj litaraj chavajecca biełaruskaja? Davajcie ž pačniem narešcie vypuskać našuju biełaruskuju śviadomaść na pavierchniu, chacia b pa ŭzory litaraŭ».

Novuju kłavijaturu možna znajści na stendach Fly Cards pa Minsku. Razam ź jaje raspaŭsiudam pačynaje pracu veb-staronkamova.budzma.org. Sa staronki mova.budzma.org možna spampavać prahramu-dapamožnik pa karystańni biełaruskaj łacinkaj, daviedacca pra historyju pachodžańnia biełaruskich ałfavitaŭ i atrymać pryjemnyja bonusy. Techpadtrymka raskładak taksama ažyćciaŭlajecca praź internet. Uvieś soft dla biełaruskaj kłavijatury i techničnaja dapamoha realizujucca jahonymi stvaralnikami na vałanciorskaj asnovie.

• 0
• 0
• 0
• 0
• 0
• 0
• 0
• 0