Ministerstva zamiežnych spraŭ Biełarusi škaduje ŭ suviazi z tym, što šerah krain Eŭropy dałučylisia da sankcyj EZ suprać A. Łukašenki i jašče 157 biełaruskich čynoŭnikaŭ,zajaviŭ ahienctvu «Interfaks» presavy sakratar MZS Andrej Savinych.
«Reakcyja na heta rašeńnie analahičnaja toj, jakaja była na sankcyi EZ, pryniatyja ŭ dačynieńni da Biełarusi 31 studzienia», — skazaŭ Savinych.
Paśla taho rašeńnia EZ Savinych kazaŭ: «MZS Biełarusi vykazvaje škadavańnie ŭ suviazi z vysnovami Savieta Eŭrapiejskaha źviazu ad 31 studzienia 2011 hoda. Sankcyjnaje myśleńnie pahłyblaje raździalalnyja linii».
Učora stała viadoma, što jašče 9 krain dałučylisia da sankcyjaŭ suprać Łukašenki.
Šerah eŭrapiejskich krain, jakija nie ŭvachodziać u Eŭraźviaz, zajavili ab dałučeńni da sankcyjaŭ suprać Łukašenki i inšych datyčnych da represijaŭ biełaruskich čynoŭnikaŭ.
Jak havorycca ŭ zajavie Viarchoŭnaha pradstaŭnika EZ pa zamiežnych spravach i palitycy biaśpieki Ketryn Eštan, Charvatyja, Makiedonija, Čarnahoryja, Iślandyja, Albanija, Bośnija i Hiercahavina, Serbija, Lichtenštejn, Narvehija zajavili, što jany padzialajuć abmiežavalnyja zachady suprać šerahu biełaruskich čynoŭnikaŭ, uviedzienyja Eŭraźviazam.
Hetyja krainy harantujuć, što ich nacyjanalnaja palityka budzie adpaviadać rašeńniu Eŭraźviazu.
Saviet ministraŭ zamiežnych spraŭ Eŭraźviazu na pasiadžeńni 31 studzienia ŭ Bruseli pryniaŭ rašeńnie zabaranić ujezd u Eŭraźviaz 158 słužbovym asobam Biełarusi, uklučajučy Alaksandra Łukašenku. Buduć taksama zamarožanyja ich aktyvy ŭ krainach źviazu, kali takija vyjaviacca.
Kamientary