Układy ŭ rublach pierastajuć być vyhadnymi

Patencyjnaja 8%-ja devalvacyja robić valutnyja depazity bolš pierśpiektyŭnymi. Rublovyja ŭkłady robiacca marnavańniem hrošaj.

Kiraŭnik Nacbanka Piotr Prakapovič padčas sustrečy z Alaksandram Łukašenkam zapeŭniŭ, što «kurs nacyjanalnaj valuty da košyka zamiežnych valut sioleta budzie ŭ miežach abvieščanaha kalidora plus/minus 8%». Pry hetym za pieršyja dva miesiacy ŭzrovień devalvacyi ŭžo skłaŭ amal 4%.

Takuju finansavuju palityku ŭchvalaje Mižnarodny valutny fond. Pradstaŭnica arhanizacyi ŭ Biełarusi Natalla Kaladzina zaklikaje ŭładu devalvavać valutu ŭ ramkach vyznačanaha kalidora. Heta, na jaje dumku, dapamoža źnizić deficyt biahučaha rachunku, jaki ŭ 2011 hodzie nabyŭ pahroźlivyja pamiery.

U studzieni zołatavalutnyja zapasy źnizilisia amal na $700 miljonaŭ. Pryčym valutnyja zapasy ŭpali da ŭzroŭniu, najnižejšaha ad 2007 hoda.

Realnaść 8%-aj devalvacyi stavić pierad nasielnictvam vybar, na jakich depazitach trymać aščadžeńni.

Paraŭnajem staŭki, jakija prapanujuć biełaruskija banki, pa ŭkładach terminam na adzin hod. U valutnym siektary samyja vyhadnyja prapanovy składajuć 8,5–9% u Biełaruskaha narodnaha banka. Pakłaŭšy na rachunak $500, praz hod možna atrymać $542–545. Takija ž umovy i dla ŭkładaŭ u jeŭra.

Kab nie atrymać straty ŭ vypadku 8%-aj devalvacyi, treba znajści rublovyja ŭkłady, u jakich staŭka hadavych budzie kampiensavać roźnicu. Najlepšaja rublovaja prapanova terminam na adzin hod praduhledžvaje 17% hadavych u «Bielinviestbanka». Zdajecca, vialikaja staŭka, ale jana płyvučaja. Heta značycca, što bank moža źmianić jaje ŭ adnabakovym paradku. Siarod prapanoŭ ź fiksavanaj staŭkaj vyłučajecca prapanova ad «RRB-Banka». Bank abiacaje 16% hadavych z raźmiaščeńniem hrošaj na paŭhoda. Ale niama nijakaj harantyi, što praz paŭhodu staŭka zastaniecca takoj samoj. U dadatak, u vyniku niezapatrabavańnia ŭkładu va ŭstalavany termin pracentnaja staŭka źmienšycca ŭdvaja. Siarod inšych varyjantaŭ zastajecca depazit ad Biełaruskaha narodnaha banku z 15% hadavych.

Kali zhadzicca na jaho i pakłaści na rachunak ekvivalent $500 — 1510 tysiač rubloŭ, to praz hod možna atrymać 1 736 500 rubloŭ. Pry ŭmovie, što dalar ad pačatku hodu sapraŭdy padaražaje na 8%, jaho kurs dasiahnie 3240 rubloŭ. Heta značycca, što na rukach u «rublovaha ŭkładčyka» zastaniecca $536.

U apisanaj situacyi dla biełarusa, jaki abiare valutny ŭkład, vyjhryš z kožnych $500 składzie kala $10. Praŭda, isnuje ryzyka, što ŭ krytyčnym vypadku niepłaciežazdolnaści krainy moža spynicca vypłata pracentaŭ i pa valutnym rachunku.

• 0
• 0
• 0
• 0
• 0
• 0
• 0
• 0