Piaty pryjarytet Pucina

Na pieršy pohlad, rasiejski prezydent-elekt u svajoj apošniaj spravazdačy ŭ jakaści kiraŭnika ŭradu pryhadaŭ Biełaruś mimachodź. Ale ŭ kantekście, u jakim jana była pryhadanaja, stasunki stara-novaj pucinskaj Rasiei ź Biełaruśsiu vyhladajuć nadzvyčaj važnymi.

Kali Pucin upieršyniu ahučyŭ ideju eŭrazijskaha sajuzu, jana zdavałasia niekatorym ci to špilkaj partneru pa tandemu, ci to pieradvybarčaj burbałkaj, sprobaj hulać na peŭnych pačućciach rasiejskaha elektaratu. Vybary skončylisia, mienš čym praź miesiac pačynajecca novaje praŭleńnie Pucina. I jon pryhadvaje eŭrazijski sajuz u liku hałoŭnych pryjarytetaŭ hetaha praŭleńnia.

Varta skazać, što paniaćcie pryjarytet u postsavieckim (dy jašče i ŭ savieckim) palityčnym dyskursie stała achviaraj davoli mocnaj inflacyi – pryjarytetam pry nahodzie abviaščałasia ŭsio: ad hlabalnaj biaśpieki i vyžyvańnia krainy da śvinahadoŭli. Mahčyma, i Pucin, nazyvajučy svaje pryjarytety, zajmaŭsia tym samym zvykłym pijaram: i heta pryjarytet, i heta, i voś toje, i naahuł usio na śviecie.

Ale pieršapačatkova pryjarytet – heta hałoŭny nakirunak, inšyja – nia prosta mienš važnyja, jany mohuć być praihnaravanyja ci navat adkinutyja ŭbok dziela dasiahnieńnia pośpiechu na pryjarytetnym nakirunku.

I kali Pucin mieŭ na ŭvazie mienavita hetaje, pieršapačatkova značeńnie, to z uzhadki Biełarusi ŭ hetym kantekście šmat čaho vynikaje. I varta źviarnuć uvahu, u šerahu jakich inšych pryjarytetaŭ byŭ pryhadany eŭrazijski sajuz: demahrafičnaje pytańnie, raźvićcio ŭschodnich terytoryj, stvareńnie pracoŭnych miescaŭ i pabudova novaj ekanomiki. Usio heta – nia prosta karysnyja mierapryjemstvy, heta čyńniki vyžyvańnia Rasiei. Dyk značyć i piaty, na dumku Pucina – nia niešta fakultatyŭnaje, nie takoje, što možna pry nahodzie rabić, ale i biaz hetaha Rasieja pražyvie.

Na dumku Pucina – nie pražyvie, heta ŭmova vyžyvańnia kiravanaj im krainy.

Toje, što jon mieŭ na ŭvazie mienavita pieršasnaje značeńnie słova pryjarytet, paćviardžajecca jaho vykazvańniami pa inšych siužetach mižnarodnaj palityki.

Mnohija pamiatajuć hramavuju pramovu Pucina na miunchienskaj kanferencyi pa biaśpiecy ŭ 2007 hodzie, kali tahačasny prezydent Rasiei abviaščaŭ chiba nie hlabalnaje supraćstajańnie Amerycy.

A što ciapier? Deputat ad KPRF zadaje premjeru pytańnie pra nataŭski tranzyt na Aŭhan, pra złaviesny blok NATA, pryhadvajučy zajavu kandydata ŭ prezydenty ZŠA Mita Romni pra Rasieju, jak «stratehičnaha voraha №1». Jakaja padača, jak skarystaŭ by jaje Pucin uzoru miunchienskaj pramovy, jak abrynuŭsia b na «amerykanski dyktat». Ale Pucin uzoru 2012 hodu prapuskaje ŭzhadku pra Romni naahuł mima vušej, a nakont Aŭhanistanu tłumačyć u styli Realpolitik, što ŭ intaresach Rasiei – kab nataŭcy bilisia z talibami ŭ Aŭhanistanie, a nie rasiejskija sałdaty – z tymi ž talibami na tadžycka-aŭhanskaj miažy. I za heta Rasieja, nia majučy asablivych sympatyj da NATA, moža navat i dapamahčy, u tym liku i lahistyčnym centram va Ŭljanaŭsku.

Nu ihnaravańnie zajavy Romni – heta mahčyma i palityčny raźlik, hrozny adkaz Pucina tolki liŭ by vadu na młyn vybarčaj kampanii kandydata ad respublikancaŭ. Ale nia vyklučana, što takaja reakcyja Pucina ŭ spałučeńni z pryjarytetam eŭrazijskaha sajuzu – heta pieraasensavańnie roli Rasiei ŭ śviecie i svojeasablivaje pasłańnie Zachadu: my – vialikaja, ale rehijanalnaja dziaržava, my nia majem suśvietnych ambicyj, chočacie, naprykład, vajavać u Syryi ci ŭ niejkim inšym miescy – vajujcie, my nia budziem kłaścisia pad vašy tanki ci nakiroŭvać svaje. Heta – vašaje. Ale našaje – heta našaje.

Heta nie aznačaje, što Rasieja admaŭlajecca naahuł ad svaich hlabalnych ambicyj. Zusim nie. Ale heta ŭžo nie pryjarytet, jana nia budzie za zadavalnieńnie hetych ambicyj achviaravać choć čymści žyćciova dla jaje važnym.

A voś što dla jaje žyćciova važnaje – hladzi 5 pryjarytetaŭ. Asabliva apošni. Za heta Rasieja hatovaja zapłacić strymanaściu svajoj źniešniaj palityki ŭ inšych rehijonach śvietu. Pry ŭsioj niesuvymiernaści persanažaŭ pryhadvajecca fraza Bismarka, jaki ŭ časy ahulnaeŭrapiejskaj mody na kalanijalnyja zachopy na pytańnie, na što ŭ Afrycy pretenduje Niamieččyna, adkazaŭ: «Voś Francyja, voś Rasieja, a voś my pamiž imi. Heta i jość maja mapa Afryki». Heta zusim nie aznačała, što palityka vialikaha kanclera była zusim užo travajednaj na paznačanaj im mapie, što daviałosia źviedać toj ža Francyi. Jon prosta nie pretendavaŭ na bolšaje.

Kali sapraŭdy palityka Rasiei mianiajecca mienavita ŭ hetym nakirunku, to Zachad u peŭnym sensie moža ŭzdychnuć z palohkaj – Maskva nia budzie stavić jamu pałki ŭ koły ŭ rehijonach, addalenych ad Rasiei, nia budzie vieści presinh na ŭsioj mapie śvietu. Ale ź inšaha boku, u svaim rehijonie – budzie. I ź impetam, jašče bolšym, čym raniej.

I Biełarusi heta tyčycca samym naŭprostavym čynam. Pakolki prajekt eŭrazijskaha sajuzu abvieščany pryjarytetam vyžyvańnia Rasiei jak krainy i dziaržavy, to možna čakać ad Maskvy peŭnaj ščodraści. Ale sproby Biełarusi saskočyć ź «ciahnika» eŭrazijskaha sajuzu i skarystacca dla hetaha sadziejańniem Zachadu buduć sutykacca sa značna bolš rezkim supraćdziejańniem z boku Maskvy, čym heta było raniej.

Pakul, na fonie kanfliktu pamiž Mienskam i Bruselem, taki varyjant ujaŭlajecca dosyć abstraktnym. Adnak nie niejmaviernym.

I pry hetym Zachad apyniecca pierad niaprostaj dylemaj: pahadzicca – adkryta ci niehałosna – na rasiejskuju zonu ŭpłyvu z uklučeńniem Biełarusi, na jakuju ŭ samoha Zachadu ŭpłyvać nia nadta atrymlivajecca, ci adchilić prapanovu Maskvy, jaje pretenzii na rolu rehijanalnaj vialikaj dziaržavy, ryzykujučy tym, što formuła Mita Romni nakont Rasiei stanie self-fulfilling prophecy – praroctvam, jakoje samo zbyvajecca.

• 0
• 0
• 0
• 0
• 0
• 0
• 0
• 0