Pastupiŭ u EHU? Spahnać 30 miljonaŭ

19 lipienia u Minskim haradskim sudzie adbyŭsia razhlad kasacyjnaj skarhi byłoha studenta histaryčnaha fakulteta BDU Alesia Šamiakina.

Sud pryniaŭ bok Biełdziaržuniviersiteta i pastanaviŭ spahnać na karyść dziaržavy srodki za navučańnie, bolš za 30 miljonaŭ rubloŭ.

U 2009 hodzie minčuk Aleś Šamiakin skončyŭ histfak BDU. Vučyŭsia jon dobra, u jaho zalikoŭcy bahata «dziaviatak» i «vaśmiorak». A dypłom na temu «Libieralizm u sučasnaj Rasii» abaraniŭ na «10».

Atrymaŭšy siertyfikat ab vyšejšaj adukacyi, jak «biudžetnik» jon musiŭ ci adpracavać dva hady pa raźmierkavańni, ci pastupać u mahistraturu, ci spłacić hrošy za ŭsie 5 hod navučańnia.

Małady historyk-palitołah padaŭ dakumienty ŭ mahistraturu Jeŭrapiejskaha humanitarnaha ŭniviersiteta ŭ Vilni na śpiecyjalnaść «Demakratyja i hramadzianskaja supolnaść». Letam ščaślivy vypusknik uładkoŭvaŭ nieabchodnyja farmalnaści pa dalejšaj vučobie. Zastavałasia adno padpisać zajavu ŭ dekanacie.

Kali ž na pačatku vieraśnia chłopiec pryjšoŭ da dekana histfaka Siarhieja Chodzina, to pačuŭ litaralna nastupnaje: «Tam, dzie jość nazva EHU, ja svoj podpis nie pastaŭlu. Jany dla nas «inšapłanietniki».

Azadačany słovami dekana, Aleś Šamiakin padaŭsia ŭ adździeł kadraŭ BDU. Tam na jaho ździŭlena pahladzieli i pakazali stos zajavaŭ na navučańnie ŭ zamiežnych mahistraturach, padpisanych inšymi dekanami. Adnak dazvołu sabie jon tak i nie zdabyŭ.

Aleś abivaŭ parohi «alma mater» niekalki dzion. Nie atrymaŭšy žadanaha podpisa, chłopiec zarehistravaŭ zajavu ŭ kancylaryi ŭniviersiteta i źjechaŭ na vučobu ŭ Vilniu.

Praź niekalki miesiacaŭ Šamiakin atrymaŭ list z BDU z patrabavańniem spłacić 30 miljonaŭ rubloŭ za vučobu va ŭniviersitecie.

My zapytali ŭ dekana histaryčnaha fakulteta Siarhieja Chodzina, čamu jon nie padpisaŭ zajavy byłoha studenta. «Ja jak dekan u dadzienym vypadku nie maju paŭnamoctvaŭ padpisvać niejkija adterminoŭki…Ja ŭžo dziesiać hadoŭ jak dekan i dobra viedaju svaje pravy», — skazaŭ Chodzin.

Pry hetym, jon nie admaŭlaje, što, kali b u zajavie Šamiakina značyŭsia nie EHU, a inšaja navučalnaja ŭstanova, jon pastaviŭ by svoj podpis.

Pa słovach Chodzina, sapraŭdny patryjot pavinien adpracavać pa raźmierkavańni.

Dekan pryvioŭ ułasny prykład: «Ja voś taksama adpracavaŭ u vioscy try hady… Z radaściu ŭzhadvaju toj čas. Potym ja pastupiŭ u aśpiranturu, vučyŭsia. Dziakuj boku, dekan fakulteta». Kali ž student źjedzie za miažu, kaža Chodzin, to chto parupicca pra «padatkapłatnikaŭ, jakija nie ź vielmi vialikich zarobkaŭ płacili padatki, kab ty atrymlivaŭ u hetaj krainie adukacyju»?

U adpaviednaści z «Pałažeńniem ab pakryćci srodkaŭ u respublikanski i (abo) miascovy biudžety, zatračanych dziaržavaj na padrychtoŭku rabočaha (słužačaha), śpiecyjalista»,

maładyja śpiecyjalisty vyzvalajucca ad pakryćcia zatračanych srodkaŭ u respublikanski i (abo) miascovyja biudžety ŭ vypadku, kali jany źjaŭlajucca asobami, zaličanymi ŭ hod zakančeńnia vyšejšaj navučalnaj ustanovy na navučańnie ŭ mahistraturu».

[Zaŭvaha: na siońniašni dzień hetaje Pałažeńnie straciła moc, ale na momant padačy pozvy BDU jano dziejničała - NN].

«Ja staŭ studentam mahistratury EHU u 2009 hodzie, to bok u hod zakančeńnia BDU. Značyć, vyzvalajusia pavodle zakona ad spahnańnia hrošaj za navučańnie», – kaža Aleś Šamiakin.

Były student bačyć «palityčnuju» pryčynu takoha rašeńnia suda:

«EHU usprymajecca biełaruskimi ŭładami jak «varožy» asiarodak. Tyja studenty, jakija paśla BDU pastupajuć u mahistraturu ŭ inšyja ŭniviersitety Jeŭropy, nie prachodziać raźmierkavańnie i ich nie ciahajuć pa sudach».

• 0
• 0
• 0
• 0
• 0
• 0
• 0
• 0