Piacihałovaja apazycyja

Demakryčnuju kaalicyju ačolać sustaršyni — piać čałaviek. Tak vyrašyli delehaty rehijanalnych kanferencyjaŭ abjadnanych demakratyčnych siłaŭ.

Jany ž prahałasavali za farmavańnie Palityčnaj rady, zychodziačy z kvotnaha pryncypu dla palityčnych subjektaŭ.

Lider Partyi kamunistaŭ biełaruskaj Siarhiej Kalakin ličyć, što na siońniašni dzień arhanizacyjnaja pabudova palityčnaj kaalicyi akreśliłasia. I navat sytuacyja ŭ Mahiloŭskaj vobłaści, dzie na pasiedžańni nie było kvorumu, nia moža paŭpłyvać na rašeńnie:

«Užo niemahčyma paŭpłyvać na ahulnyja vyniki. Navat kali ŭ Mahilovie prahałasujuć za niejki varyjant kansalidavana, heta ŭžo nia moža źmianić ahulnaj karciny.Jość takoje mierkavańnie — pa‑pieršaje, tyja, chto chacieli, užo vykazalisia. I tamu treba dać mahčymaść prahałasavać i tym, chto ŭ subotu nia zmoh albo nie chacieŭ hałasavać. Kab i ich mierkavańni ŭličyć u ahulnaj dumcy».

Udzielniki rehijanalnych schodaŭ schilisia da pierachodu kiraŭnictva abjadnanymi demsiłami ad adnoj asoby da sustaršyniaŭ.

Staršynia abjadnanaj hramadzianskaj partyi Anatol Labiedźka ličyć, što heta pravilnaje rašeńnie:

«Heta nazyvajecca instytutam sustaršynioŭstva. Ale nasamreč heta viadzie da zamacavańnia za kankretnymi asobami kankretnych kirunkaŭ dziejnaści dy adkaznaści.

Što tyčycca sustaršyniaŭ, dyk pytańnie vyrašanaje. Pieraličanyja asoby — Milinkievič, Kalakin, Viačorka, Kazulin (zamiest jaho Laŭkovič) i ja. Nia dumaju, što patrebna było prapisvać kankretnyja proźviščy, mabyć, było b lepš zapisać pasadu kiraŭnikoŭ adpaviednych palityčnych strukturaŭ. Ale ž farmuloŭka była z asabistymi proźviščami. I tamu skład sustaršyniaŭ užo viadomy».

Da farmavańnia Palitrady isnavali dva padychody. Pieršy — praparcyjny, heta značyć, ad kožnych dziesiaci delehataŭ Kanhresu adzin pradstaŭnik u radzie. I druhi — kvotny, heta značyć, što kožny subjekt Palitrady maje svajo peŭnaje pradstaŭnictva.

Staršynia Partyi BNF Vincuk Viačorka škaduje, što pieravahu addali kvotnamu pryncypu. Čamu?

«Na maju dumku, na žal, kvotny pryncyp fiksuje prysutnaść małaznačnych i navat fantomnych arhanizacyjaŭ u Palityčnaj radzie. A heta nie idzie na karyść farmavańnia cyvilizavanaha biełaruskaha demakratyčnaha pola».

Siabru Palitrady Viktara Karniajenku turbujuć palarnyja padychody na rehijanalnych schodach:

«Možna pryniać lubuju stratehiju, ale kali niama adzinaj kamandy, jana nia budzie realizavanaja. Ź nievialikaj pieravahaj pieramahaje kancepcyja, što nie patrebny staršynia, jaki adkazny za ŭsio, a jość kalektyŭnaja forma kiravańnia — jak samaja efektyŭnaja forma biezuładździa. Siamibajarščynu prydumali nie biełaruskija apazycyjanery. Ale ž jana nikoli nie daje plonu.

Ja liču, što systemnaja biełaruskaja apazycyja znajšła zručnuju formu demanstracyi adzinstva. Ale heta nijak nie pahražaje režymu».

• 0
• 0
• 0
• 0
• 0
• 0
• 0
• 0